Қазақстан өз азаматтарын Уханнан эвакуациялады

2 ақпанда ҚР Денсаулық сақтау министрлігінің Шұғыл медицина координациялық ұлттық орталығы Қазақстанның 83 азаматын елге жеткізді, олардың 80-і - Уханда оқып жатқан студенттер, - деп хабарлайды Tengrinews.kz тілшісі ведомство баспасөз қызметіне сілтеме жасап. 

Сапар барысында елге қайтып келе жатқан азаматтарды қазақстандық дәрігерлер бақылап отырған. 

"Денсаулығын тексергеннен кейін елге оралғандар елордадан 7 шақырым жерде орналасқан елордалық көпсалалы ауруханаға қарасты инфекцияға қарсы корпусқа 14 күнге карантинге жатқызылды", - деп жазылған хабарламада. 

Аурухана қажетті инфекциялық қауіпсіздік технологиясымен, заманауи диагностика, ем және реанимациялық құрылғылармен жабдықтылған. Мұнда эвакуацияланған тұрғындар қосымша тексерістен өтеді. Оларда коронавирус инфекциясының бар-жоғары тексеріледі. 

Карантин кезінде олармен инфекциямен күрес бойынша тәжірибесі бар медициналық қызметкерлер жұмыс істейді. 

Еске салайық, Қытай билігі 2019 жылы 31 желтоқсанда Дүниежүзілік денсаулық сақтау ұйымына Ухан қаласында белгісіз вирустың тарай бастағанын хабарлаған. Мамандар Ухан қаласындағы теңіз өнімдері базарынан алынған сынамаларды зерттеп, вирустың қайнаркөзі сол базарда сатылған жабайы жануарлар болғанын анықтаған.

1 ақпандағы жағдай бойынша, Қытайда коронавирустан қаза тапқандардың саны 304-ке, ал вирус жұқтырғандардың саны әлем бойынша 14 380-ге жеткен.