Бәріміз саяхаттап, жаңа аймақтар көріп, жаңа адамдармен танысқанды жақсы көреміз. Біз сөз етіп отырған фестиваль көптеген адамға осы мүмкіндікті сыйлап отыр.
Шығыс Қазақстан облысының Риддер қаласының маңында 1-ші халықаралық "Алтай.kz-2012" жолсызда жүруге арналған көліктер фестивалі басталды. Осы салтанатты шараны өз көзімен көріп, оқырмандарды фестиваль барысымен таныстырып отыру үшін Massaget.kz тілшісі Ғани Тұрғымбеков Риддерге жол тартқан болатын.
Бұл жиынның елімізде алғаш рет өткізіліп отырғандығын айтып өтелік. Фестивальдің ашылу салтанаты бүгін, яғни, 7 шілде күні, таңертең Риддер қаласында өтті. Орталық алаңда болған салтанатты жиында Риддер қаласы әкімі мен шараны ұйымдастырушылар сөз сөйлеп, қатысушыларды құттықтады.
Бұдан соң барлық қатысушылар қаладан 35 км жерде орналасқан негізгі лагерьге жол тартты. Үздіксіз жауған жаңбырдың әсерінен жер балшықтанып, көп автолар батып қалып жатты. Әйтеуір не керек, сіз-біз десіп, барлық қатысушылар межеленген уақытта, лагерьге жетті.
Лагерь Оба өзенінің жағасында, бірнеше төбелердің ортасында орналасқан. Фестивальдің қауіпсіздігін Ресейден арнайы келген атаман Владимир Чмутов бастаған казактардың отряды қамтамасыз етеді. Біз келген жерде шатырлардан бөлек балаларға арналған ойын алаңы мен бірнеше далалық кафелер бар екен.
Айта кетерлігі, фестиваль қатысушыларының көп бөлігі Ресейден келген джиперлер. Шамамен 60 пайызы Оңтүстік Сахалин, Владивасток, Хабаровск, Чета, Иркутстк аймақтарынан келді. Бұлармен қатар Польша, Қырғызстаннан келген экипаждарды кездестірдік.
Еліміздің кеден одағына кіргендігі Ресейден келген қонақтарға көп жеңілдік болып, шекарадан өту процесінде қиындық көрмепті.
Фестиваль шілденің 6-13 аралығында Шығыс Қазақстан облысындағы Риддер қаласының маңында өтеді. Алдағы уақытта массагеттіктерді шара қызықтарымен хабардар етіп отыратын боламын.
Оқиға орнынан Ғани Тұрғымбеков
Фото: Ғани Тұрғымбеков ©