8 наурыз... Не сыйлаймын?

Жылдың ең шырайлы мейрамы қарсаңында ер кісілердің барлығы сүйіктісіне, анасына, әпке-қарындастарына, әжесіне не сыйлаймын деп ойланады. Біздің кеңестерімізге көз жүгіртсеңіз, сый таңдау ісі оңай болмақ. 

Әрине, сый-құрметімізді біріншіден бізді мәпелеп өсірген, тәрбиелеген жандарға көрсетіп, ана-әжелерден бастайық.

Әжеге сыйлық

Сүйікті әжемізге сыйлық таңдағанда, оның мінезі мен әдеттерін есепке алуыңыз жөн болар. Әр әженің өзінің сүйікті істері бар. Кейбіреулері үйде отырып, тәтті бәліштерді пісіруді ұнатса, басқалары спорт пен демалысты жақсы көреді. Әр әженің болмысына сай сыйлықтар да әр түрлі болмақ.

• Үй әжесі  ас үйіне қажет ұсақ-түйектерді немесе ғажап әсерлі фармацевтикалық дәрі-дәрмектерді қуана-қуана қабыл алады. 
• Заманға сай өмір сүретін әжеге жаңа сәнді косметика топтамасынан немесе үй интерьерына арналған ерекше заттарды сыйға тартса болады. 

Анаға сыйлық

Анаға сыйлық таңдау қиынырақ болар. Сонда да сүйікті анаңызды сізден жақсы кім біледі? Бастысы -  күнделікті қажет, үй заттарын сыйламаңыз. Оны бір қуантып, гүл, косметика немесе әшекей бұйым тарту етіңіз. Анаңыз 8 наурыз күні өзін жас, сұлу сезінсін.

Бастыққа сыйлық

Бастығыңыз әйел кісі болса, оған сыйлық сыйлағанда ерекше көңіл бөлгеніңіз дұрыс болар. Бастыққа жақсы сыйлық - интерьер бұйымы не өнер туындысы. Әдемі сурет немесе сәнді мүсін сынды заттар оның көңілінен шығар деп ойлаймыз. Косметика, әшекей бұйым  немесе киім сыйлаушы болмаңыз!

Әпке-қарындастарға және жақын дос қыздарға сыйлық 

Бұл жандарға сый таңдау әлдеқайда оңай болмақ. Қалағаныңызды сыйласаңыз болады. Дүкен аралап жүргенде, көзіңізге түскен кез келген сүйкімді затты алып берсеңіз болады. Косметика, әтір, интерьер бұйымы, әшекей бұйымы... Бұл қыздар сіз оны ұмытпай, сыйлық бергеніңіздің өзіне риза болады. 

Сүйіктіңізге сыйлық

Жігіт жүрегінің  қожайыны - оның сүйіктісіне де келіп жеттік. Оған сыйлық таңдау қиын да, жеңіл де... Әрине, сыйлықтың басты бөлігі гүл болуы керек. Гүлді, мысалға оның жұмысына жіберуге болады. Әріптестерінің көзінше көрсетілген бұндай ілтипат, қызыңыздың көңілінен әлбетте шығар. Бұл күні ерекшеленемін десеңіз, таңертең, түсте және кешке бір шоқ гүлден жіберіңіз. Кешке нағыз батыр атанарыңыз сөзсіз.

Бірақ, басты сыйлықты ұмытып кетпеңіз. Гүлдер қандай керемет болса да, ғашығыңыз сізден ерекше сыйлықты күтеді. Кешке оңаша қалғанда беретін бұл сыйлық тосын сый болса, нұр үстіне нұр. Қыздар күтпеген тосын сыйларды қатты жақсы көретіні баршаға мәлім. Қымбат сыйлық аламын деп, шығынға батпаңыз. Дүкендерді аралауға бір күн бөліп, сүйіктіңізге ұнайтын затты іздестіріңіз. Әрине, одан не қалайтынын алдын ала біліп алғаныңыз жөн. Сізді шынымен сүйетін қыз қымбат гауһар тастарын сұрамасы анық. 

Сондай-ақ, ашық хат туралы ұмытпаңыз. Таңдауыңызға - мыңдаған түрі бар, қалағаныңызды сыйлаңыз. Сонда да, өз қолыңызбен жасалғаны ерекше қымбат болмақ.

Сүйіктіңізге ең ғажап сыйлық - сіздің махаббатыңыз бен көңіліңіз  екенін ұмытпаңыз.

Өміріңіздегі өзіндік орны бар әр қыз баласына ерекше ілтипат пен жымиған күлкіңіз бұл күні мерекелік көңіл-күй бермек.

Сурет: season.kz