22 наурыз. Айгерім Қалмұратова ұсынған "Рахат-лукум" мәзірі

18 наурыз 2014, 09:56

22 наурыз мерекесі қарсаңында жас әнші Айгерім Қалмұратованың асханасында қонақта болдық. Он саусағынан өнер тамған өнерлі бойжеткен "Рахат-лукум" аталатын тәттіні дайындау мәзірін ұсынады.

Құрамы:

Сұлы жармасы
Грек жаңғағы
Қант
Шие шырыны
Ванилин
Қант ұнтағы

1 стақан қантты шұңғыл кәстролге салып, үстіне дәл сол мөлшерде су құясыз.

Енді бір стақан шие шырынын құясыз, бұл тәттіге түс беру үшін қажет. Егер сары түсті "Рахат-лукумды" қаласаңыз, апельсин шырынын құйыңыз.

Енді жаңғақты ұсақтау керек.

Қант әбден еріп, су қайнағанда үгітілген жаңғақты саласыз.

Жаңғақты салғаннан кейін 1 минут өтісімен жарманы салыңыз да, 2-3 қалта ванилин қосыңыз. Барлығын қоюлатылғанша қайнатасыз.

Жалпақ әрі шұңғыл ыдысқа қант ұнтағын сеуіп, дайын болған қоспаны саласыз. Аздап суыған соң тоңазытқышқа 1 сағатқа қалдырып қойыңыз. Қатқан тәттіні өзіңіз қалаған пішін бойынша кесесіз.

"Рахат Лукум" дайын! Асыңыз дәмді болсын!

Ас үйде болған: Айгерім Қалмұратова және Айгерім Сматуллаева

М. Оңғарова