Меніңше, ойын-сауық контентінен гөрі негізгі назарды танымдық, ақпараттық, сауат арттыратын контентке аударсақ, қазақ аудиториясын тәрбиелеп, бойларында ғаламтордың жалпы қолдану әдебін сіңіреміз. Ия, біраз уақыт ұтыламыз, адамдар көрмейді, қаралым аз. Дегенмен, уақыт өте келе бұл әдіс жемісін береді.

Негізі ғаламтор атаулысының өзі іш пысқандағы әңгіме ғой. Әр түрлі аудитория бар және соған сай контент бар. Халықтың саналық деңгейін оның тамашалайтын контентінен-ақ аңғаруға болады. Демек, танымдық бағыттағы контент қазіргі сәтте қажет. Бірақ тиімсіздеу.

100-78=22! Жаман емес! Саналы адамдардың пайыздық көрсеткіші артып келе жатқанына қуанамын. Mail.ru – агентті қойып, Gmail-дан пошта ашуды үйренген қазекем болашақта бүкіл танымдық дүниені YouTube желісінен іздейтін болады. Бұған еш күмәнім жоқ.

Біздің БАҚ көшін ұстап отырғандар, телеарналардың инвесторлары мен акционерлері ҚАЗАҚ емес, тіпті қазақ болса да ЖАНАШЫР емес. Әрине, экономиканың заңы бойынша олардың көздегені – тек коммерция. Ол үшін оларды даттаудың қажеті жоқ, жәй ғана жастар тарапынан білімді шыңдап, аға буын өкілдерін ысыру керек. Толқыннан толқын туады, толқынды толқын қуады. Біз міндетті түрде аға буын өкілдерінің орнын басамыз, әлбетте, соған лайықты және мықтырақ болуымыз керек.

Келісемін. Деңгей төмен. Алайда, жоқтан бар. Қанша дегенме,н оның өзі қазақ YouTube желісінің даму жолында тер төгіп жатыр ғой. Не дұрыс, не бұрысын білмеймін, бірақ, дәл қазіргі сәтте қазақ YouTube желісіне бәрі жетіспейді.

Отандық YouTube-қа санасы орыстанбаған, идеялық реактор бола алатын тұлғалар керек. Өзіңіз айтқан жалған патриотизм, жасанды қойылым, хайп-шмайптың бәрі уақытша нәрсе. Ізгі ниет пен идея - өміршең. Youtube-қа нық қадаммен келген адамды көрермендер қолдап, дамуына сеп тигізіп, арқасүйер болады.

Көрермен деңгейіне пікір айтатындай ол әлі тұрақтанған жоқ. Интернет ауыл аймаққа жетті, урбанизация, қазақ қоғамындағы түрлі адамдар қатары, түрлі бағыт беріп жатыр. Уақыт керек, бәрі жақсы болады. Ал әзірге, нашарлау, әрине. Ютубте отыру ол жәй ғана көру емес қой, онда көптеген дүниелер орын алған. Интеллектуалды меншік, авторлық құқық, спам, еркіндік, бақылау, пікір жазу өнері және тағы басқа терминдермен таныс болса көрермен деңгейі өседі.

Көрермен деңгейін өсіретін – біз. Ал, деңгейі төмен көрермен – тұтынушы емес. YouTube-тан баю үшін көрермен деңгейін өсіру қажет. Әзірге, бұл жәй ғана түс.

Өкінішке қарай, әзірше көрерменнің талғамы төмен. Бірақ, сол аудиторияны тәрбиелейтін де блогерлер. Сапалы контент жасайтын адамдар саны артқанда көрермен талғамы өзгереді. Ұлы жазушы Мұхтар Әуезовтың «Ел болам десең бесігіңді түзе» деген терең мәнді нақылы бар емес пе, соны интерпретацияға салсақ «Ел болам десең, YouTube-ыңды түзе» болушы еді.