Бүкіләлемдік бокс сериясының (WSB) жартылай финалына шыққан "Astana Arlans" пен Ұлыбританияның "British Leonhearts" командалары арасындағы қарымта кездесуде жекпе-жекке шығатын боксшылар белгілі болды.
Қос команда арасындағы қарымта кездесу 8 маусым күні Ұлыбритания елінің астанасы Лондонда өтеді. Жекпе-жектер Астана уақытымен сағат түнгі 01:00-де басталады. Vesti.kz порталы бұл кездесуді тікелей эфирде көрсететін болады.
Жекпе-жекке қатысатын боксшылардың тізімі:
52 келі: Олжас Сәттібаев - Дин Фарелл.
60 келі: Зәкір Сафиуллин - Чад Милнс.
69 келі: Асланбек Шымбергенов - Кумар Манодж.
81 келі: Арман Рысбек - Томас Уитаккер-Харт.
+91 келі: Нұрсұлтан Аманжолов - Патрик Майлата.
Егер есепте екі команда тең түсетін болса, финалдың жолдамасы қосымша 52 келі салмақтағы боксшылар жекпе-жегімен жалғасады. Бұл салмақта "Арландар" сапынан Анвар Мұзапаров барса, британдық команда Блэйн Хэйландты дайындап отыр.
Еске салайық, Қостанай қаласында өткен бірінші жартылай финалдық кездесуде елордалық команда 4:1 есебімен жеңіске жеткен еді.