Англияның «Манчестер Юнайтед» футбол клубы 2015 жылдың жазында мадридтік «Реалдың» көшбасшысы Криштиану Роналдуды өз командасына қайтарып алу үшін әрекет етпек. Бұл туралы британдық The Independent газеті хабарлап отыр.
Португалдық футболшының өзі бұдан бұрын «Олд Траффордқа» қайта оралатыны туралы сыңай білдірген-ді. Сондай-ақ, бұқаралық ақпарат құралдарының хабарлауынша, соңғы уақытта «Реалдың» транферлік саясаты аясында, клуб басшылығы мен Роналду арасында түсініспеушіліктер туындап жатқандығы белгілі болып отыр.
Роналду бұл туралы жақында ғана: «Менің «Реалдың» трансферлігіне байланысты нақты ойым бар. Бірақ мен ойымды әр кезде жария қыла алмаймын», - деген болатын.
«Манчестер Юнайтедтің» жаңа ойыншысы, Роналдудың ең жақын досы Анхель Ди Мария да бұл ақпаратты растап отыр. Оның айтуы бойынша, Роналду жақын уақытта «Реалдан» кететін көрінеді. «Білмеймін тіпті, Роналду Мадридте енді қанша уақыт төзіп жүреді. Менің ойымша, ол бұл жерде өзін бақытты сезіне алмай жүр», - дейді аргентиналық футболшы.
Естеріңізге сала кетсек, «Қызыл сойқандар» 2009 жылдың маусым айында Роналдуды «Реалға» 80 миллион фунт стерлингке сатқан болатын. Бір жыл өткесін жаңа келісімшарт қаралып, Роналду әлемдегі ең жоғарғы жалақы алатын футболшы атанған-ды. Ол келісімшарт мерзімі 2018 жылдың жазына дейінгі уақытты құрайды. Роналду «Манчестер Юнайтед» сапында 2003 жылдан 2009 жылға дейін өнер көрсетті.
Дайындаған: Нұржігіт Айдархан
Сурет: fbblog.ru