Годе белдемшесін немен киюге болады?

28 наурыз 2014, 10:38

Қыздар гардеробының ең негізгі бұйымы – белдемше. Әр маусым сайын дизайнерлер белдемшенің түрлі үлгілерін сәнге кіргізіп жатыр. Мәселен, бір кездері буда-белдемшелер сәнді болған болса, кейін бәрі жаппай бәйшешек-белдемшеге көшті. Ал былтырғы жылы макси белдемшелер басты назарда болды. Бұдан бөлек белдемшелердің классикалық үлгілері де бар. Мысалы, дәстүрлі түзу белдемше, қарындаш-белдемше және годе белдемшесі. Бүгінгі жазбамыз соңғы айтылған годе белдемшесі туралы болмақ.

Годе — бұл үстіңгі жағы қонымды келген, бірақ етегі кең түзу белдемше. Етегін матаға үшкіл салып тігеді. Көбіне годе белдемшелерінің ұзындығы тізеге дейін келеді немесе одан сәл төмен болуы мүмкін. Мұндай белдемшелердің басты артықшылығы – тым толық сандарды жасыруға көмектеседі.

Годе белдемшесі іскерлік стильдегі киімдермен де жақсы үйлеседі. Қатал түзу үлгіге қарағанда кең етек ерекше және сәнді көрінеді. Ал жеңіл, ашық түсті маталардан тігілген мұндай белдемшені жазғы серуендерге, кездесулерге киіп баруға болады.

Егер сізде годе белдемшесі бар болса, оны немен үйлестіріп киюге болады? Алдымен ұзындығы тізеге дейін болатын үлгіні қарастырып көрейік.

- Жакетпен

Жакет пен белдемшенің матасын, түсі мен фактурасын бірдей етіп таңдауға болады. Мұндай белдемшеге, әсіресе, қынама бел жакеттер жақсы жарасады. Алайда оның тым ұзын болмағаны жөн.

- Жемпір-водолазкамен

Тығыз мақта матадан, жұқа жүн матадан немесе акрилден тігілген жеңі және мойны ұзын қынама водолазкалар годе белдемшесімен жақсы үйлеседі. Егер водолазка бір түсті болса, онда ұзын моншақ немесе бауы ұзын ірі мойыналқа тағып алуға болады.