Қазақстанның спорт және мәдениет министрі Арыстанбек Мұхамедиұлы Алматыда өтетін Универсиада ойындарында топ жарған қазақ спортшылары қандай көлемде сыйақы алатынын жариялады - деп хабарлайды vesti.kz сайты.
Министрдің мәліметі бойынша Универсиада ойындарында топ жарып, бірінші орын алған қазақстандық спортшы 4,9 миллион теңге көлемінде қаржылай сыйақы алады. Ал, екінші орын үшін - 3,3 миллион теңге, үшінші орын иемденген спортшыға 1,6 миллион теңге сыйақы беріледі. Сонымен қатар топ жарған спортышлардың жаттықтырушыларына да әр түрлі көлемде сыйақы қарастырылған.
Айта кетейік, 28-ші Бүкіләлемдік қысқы Универсиада 2017 жылдың 29 қаңтарынан бастап 8 ақпаны аралығында Алматыда өтеді. Жарыс бағдарламасына мәнерлеп сырғанау, шорт-трек, тау шаңғысы, сноуборд, биатлон, шаңғымен жарысу, шайбалы хоккей (әйелдер мен ерлер арасындағы), керлинг, шаңғымен трамплиннен секіру, шаңғы қоссайысы, конькимен жүгіру спорты, фристайл секілді 12 спорт түрі кірген. Жарыстарға 2 мыңға жуық спортшы қатысады деп күтілуде. Универсиада өткізілетін уақытта 3 мың ерікті, оның ішінде шетелдік еріктілер атсалысады. Студенттер арасындағы спорт ойындарына 30 мыңға жуық отандық және шетелдік турист келеді деп күтілуде. Сайыстарды әлемнің 80 еліндегі 1 миллиард адам теледидар арқылы тамашаламақ.