Қыркүйекте күн райы қандай болады?   

Қыркүйекте күн райы қандай болады?  

Күз келіп, табиғат та өзгеріп салар мезгіл таяп келеді. Таңда қырау түсіп, күн де суыта бастайды. Ендеше осы мезгілдің алғашқы айы қыркүйекте күн райы қандай болады? Бұл жайында Қазгидромет хабарлады.

Қазақстан аумағының басым бөлігінде, көпжылдық деректер бойынша, үсік қыркүйектің бірінші жартысында, оңтүстік облыстарда айдың соңында ғана байқалуы мүмкін. Алайда консультативтік болжамға сәйкес, айдың басында елдің солтүстік және орталық аймақтарында топырақ бетінде 2 градусқа дейін аяз болады деп болжануда.

Қыркүйек айының басында циклонның және онымен байланысты атмосфералық фронттардың әсерінен күн райының тұрақсыз сипаты елдің батыс, шығыс аймақтарында жәнеоңтүстік-шығыстың таулы аймақтарында байқалады. Онкүндіктің соңында Қазақстанның солтүстік-батыс жартысында күн күркіреп, бұршақ жауып, жел күшейіп, екпіні 15-23 м/с-ге жетеді.

Айдың бірінші онкүндігінде Батыс суық антициклонының, батыс өңірлерге кіруі күндіз ауа температурасының +30+35°С-тан +17+25°С-қа дейін төмендеуіне әкеледі. Сонымен қатар республиканың қалған аумағында Жерорта теңізінің шығыс жағалауынан жылы ауа массаларының оңтүстік-батысқа шығарылуымен республиканың солтүстігінде, орталығында, шығысында ауа температурасының күндіз +13+20°С-тан +23+30°С-қа дейін, оңтүстігінде, оңтүстік-шығысында +25+32°С-тан +28+37°С-қа дейін өзгеруі күтіледі.

Екінші онкүндіктің басында батыс өңірлерден суық антициклон елдің солтүстігі мен орталығына салқын күн райын әкеледі. Нәтижесінде ауа температурасының төмендеуі күтіледі.

Айдың екінші жартысында температуралық фонның көтерілуі халықтық күнтізбеде "үнді жазы" деп аталады. Алайда ауа температурасы Қазақстанның солтүстігінде, орталығында және шығысында түнде +5+13°С-тан -5+10°С-қа дейін, күндіз +20+28°С-тан +15+20°С-қа дейін; елдің оңтүстігінде және батысында түнде +7+15°С-тан 0,+5°С-қа дейін, күндіз +25+30°С-тан +17+22°С-қа дейін ауытқиды.

Ескертпе: бір айға арналған консультациялық болжам синоптикалық жағдайдың өзгеруіне қарай түзетілуі мүмкін және онкүндік болжамдармен нақтыланатын болады.