Алматы "сары" аймаққа кірді - Сағынтаев

Алматы "сары" аймаққа кірді - Сағынтаев
Фото: cdnuploads.aa.com.tr

Алматы коронавирус жұқтыру қаупінің "сары" аймағына кірді. Бұл туралы қала әкімі Бақытжан Сағынтаев Instagram-да жазды.

"Құрметті алматылықтар. Биылғы 2020 жыл біз үшін үлкен сабақ болды. Ең бастысы - босаңсымау. Пандемия басылған жоқ. Бүкіл әлемдегі жағдай да ушығып тұр. Алматы жұқтыру қаупінің "сары" аймағына енді. Баршаңызды санитарлық ережелерді қатаң сақтауға шақырамын. Жағдай күрделенсе, режимді күшейтеміз", - деді әкім.

Еске салайық, кейінгі тәулікте (27 қарашадағы деректер бойынша) Қазақстанда коронавирус жұқтырған 826 адамның 84-і Алматыда тіркелген.

Бұған дейін Алматының бас санитар дәрігері Жандарбек Бекшин қалада COVID-19-ға қатысты жағдай тұрақсыз екенін мәлімдеген болатын.

"Эпидемиологиялық жағдайдың нашарлау тенденциясы бар. 26 қарашадағы жағдай бойынша Алмалы және Бостандық аудандары сары белдеуде, аурушаңдық деңгейі сәйкесінше 28,5 және 29,4, Rt индикаторы екі ауданда 1,1-ге тең. Әуезов (21,2) және Медеу (23,3) аудандары коронавирус инфекциясының жиілігі бойынша "қауіп" аймағында. Таралу индексі бойынша ең тұрақты жағдай Жетісу (0,9) және Түрксіб (1,0) аудандарында байқалады", - деді ол.

Бекшин Алматыда ауру өсімі қазанда басталғанын, онда 366 КВИ жағдайы тіркелгенін хабарлады. Бұл қыркүйекпен салыстырғанда 2,2 есе жоғары (165 КВИ жағдайы). Биыл 26 қарашадағы жағдай бойынша қалада коронавирус жұқтырған 1122 адама тіркелген, қыркүйекпен салыстырғанда ауру жұқтыру 7 есеге өскен.

tengrinews.kz

Г. Берік