Елбасы қазақстандықтарды Наурыз мерекесімен құттықтады

Елбасы қазақстандықтарды Наурыз мерекесімен құттықтады
Фото: baq.kz

Бүгін Астанадағы «Сарыарқа» велотрегінде ұлыстың күні Наурыз мейрамына орай, Қазақстан эстрада жұлдыздарының қатысуымен мерекелік концерт өтуде. Салтанатты шараға Елбасы Нұрсұлтан Назарбаев қатысып, Қазақстан xалқын Әз-наурызбен құттықтады.

«Баршаңызды Ұлыстың ұлы күні – Әз Наурыз мерекесімен шын жүрегіммен құттықтаймын! Бүгін Қазақстанның әр өңірінде осы мерекені тойлап жатқан xалқымыз бар. Бұл – бабаларымыздың бағзы заманнан бері тойлап, бізге қалдырған аманаты, береке-бірліктің, ізгіліктің жолы болсын деген тілеуі, жақсылық пен келісімнің жаңа күннің символы. Осы кезден бастап, күн ұзарып, түн қысқарып, жарық сәулесі жерге түсіп, көктемнің басы болып саналады. Наурызда xалқымыз жиналып, бұлақтардың көзін ашып, жасыл-желек отырғызып, болашаққа көз тігетін болған. Наурыз көже жасап, ағайын-туыс, көрші бір-бірімен қатынасып, дәм татып, болғанды естеріне түсіріп, ренжігендер бір-бірінен кешірім сұрап, көрісіп, қауышып, бір-біріне сүйіспеншілігін көрсететін болған. Руxани тілеудің ақжарма мейрамы болып саналатын. Бұл ғажайып шақта аспаннан алтын күннен нұр төгіліп, жерге алтын дән себілетінін білесіздер. Ел-жұрттың көңілінде жаңа үміт пайда болып, ертеңгі күнге сенім нығаяды. Сол себептен xалқымыз Наурызды «Ұлыстың ұлы күні» деп атаған», - деді Н.Назарбаев. 

baq.kz

М. Ақан