Назарбаевтың жиені Қазақстан футбол федерациясының президенті болуға өтініш білдірді
Нұрсұлтан Назарбаевтың жиені Айсұлтан Назарбаев Қазақстан футбол федерациясының президенті болудан үмітті. Бұл туралы ВКонтакте желісіндегі «За тебя, Бәке» тобы хабарлайды.
Желіде Айсұлтан Назарбаевтың өзін Қазақстан футбол федерациясының президенттігіне ұсынғаны туралы ақпарат пайда болды.
Айсұлтан Рахатұлы қазіргі ҚФФ президенті Ерлан Қожағапановтың екі бірдей лауазымды қызметті қатар алып жүргенін сынға алған.
«Ерлан Қожағапанов мырза ҚФФ президенттігімен қатар, «Астана» кәсіби спорт клубының басшысы міндетін де атқарып жүр. Ал ФИФА заңы бойынша, бұған жол берілмеуі керек. Сондықтан, кезектен тыс ҚФФ президентінің сайлауын өткізуді ұсынып, оған өзімнің үміткер екенімді айтқым келеді. Өзімнің ойыншы ретіндегі және Біріккен Корольдіктегі тәжірибеме сүйене отырып, барлық білімім мен күш-қуатымды Қазақстан футболына жұмсауға дайынмын», – делінген хатта.
Еске сала кетейік, Айсұлтан Назарбаев Ұлыбританияда футбол тәлімін алып, «Астана» және «Сұңқар» клубтарында доп тепкен болатын.
Кезінде Айсұлтанның әкесі Рахат Әлиев Қазақстан футбол одағының президенті қызметін атқарып, Қазақстанның УЕФА қатарына өтуіне септігін тигізген еді.
Дереккөз: NUR.KZ
