Алматы тұрғындарын ауа сапасынан хабардар ететін LED-экран іске қосылды

Алматы тұрғындарын ауа сапасынан хабардар ететін LED-экран іске қосылды
Фото: twitter.com

Алматыда қала тұрғындарын мегаполистің әр аумағындағы ауа сапасы туралы хабардар ететін жоба іске қосылды. Бұл туралы әкім Бақытжан Сағынтаев Twitter-дегі парақшасында жазды.

"Атмосфералық ауаның сапасын LED-экранда көрсетеміз. Қаланың әр бөлігінде орналасқан датчиктердегі ақпаратты Қазгидромет жаңартып, өңдейді. Бұл жоба алматылықтардың қаланың экологиялық ахуалын біліп отыруына мүмкіндік береді", - деп жазды Б. Сағынтаев.

Ақпарат 26 датчик арқылы жақын маңдағы LED-экранға түседі. Мұндағы мәліметтер бір күнде үш рет жаңартылады.

Қосымша тағы 10 мониторингілік станса қосылатын болады.

Мәліметтер ауаның негізгі 6 көрсеткішінен тұрады. Олар: РМ 2,5 өлшенген бөліктері, күкірт диоксиді, азот диоксиді, азот оксиді, көміртегі оксиді, фенол.

Бұл жоба Алматы әкімі Бақытжан Сағынтаевтың тапсырмасына сәйкес жүзеге асып отыр және қаланың экологиялық ахуалын жақсартудың кешенді шараларының бірі.

Айта кетейік, экологиялық ақпаратқа қолжетімділік құқығы ҚР Экологиялық кодексінде айтылған.

Т. Раушанұлы