Bentley-дің бірінші джипі

26 наурыз 2013, 16:03

Британдық Bentley компаниясының жетекшісі Вольфганг Шрайбер жыл сайын өтетін баспасөз-конференциясында компания өзінің алғашқы джипін 2015 немесе 2016 жылы жарыққа шығаруды жоспарлап отырғандығын мәлімдеді. Және жаңа көлік әдеттегідей Англияның Кру қаласында емес, Словакия елінің Братислава қаласында жинақталатын болады. Швайбердің айтуынша, жоба кейбір мәселелер шешілгеннен соң ғана толықтай қабылданады.

Сондай-ақ, Bentley-дің бірегейлігін сақтап қалу мақсатында Крудан Братиславаға автокөліктің интерьеріне қажетті барлық элементтерді жеткізіп тұру жоспарланып отыр. Шрайбер, сонымен қатар, жаңа көліктің 2012 жылы Женева автосалонында көрсетілген түп-тұлғасынан анағұрлым ерекшеленетінін атап өтті.

Автокөліктің нақты бағасы, сыртқы келбеті мүлдем белгісіз болғанына қарамастан, жаңа көлікке 2000 тапсырыс түсіп үлгерген. Шрайбер мұндай әрекетті сатып алушылардың компанияға деген сенімінде деп есептейді.

Жаңа Bentley-дің құны шамамен 125 000 британ фунтын құрайды. Сатылымдардың 50 пайызы АҚШ пен Қытай елдерінде жүзеге асады, қалғаны Еуропа, Ресей, Таяу Шығыс елдерінің нарығына іске аспақ.

Bentley компаниясының жетекшілігі жаңа автокөлік 2018 жылға дейін аталған маркалы көліктердің сатылымын 15000 данаға дейін арттырады деп үміттеніп отыр. Айта кетсек, 2012 жылы Bentley маркалы көліктің 8510 данасы сатылған.