2016 жылы Mashable басылымы фотожурналистер туралы материал жариялады. Оның ішінде Стефани Синклер де бар. Басылым фотограф суреттерінің бірін Instagram парақшасынан кіріктіріп (репост) пайдаланған. Себебі Mashable-дың Синклер фотосуретіне лицензиясы болмаған. Салдарынан Синклер басылымды сотқа берген. Фотографқа олардың мұндай айласы ұнамай қалған.
Биыл 13 сәуірде сот шешімі шықты. Сот Кимба Вудтың айтуынша, Instagram-ның онда жарияланған контентке қатысты "толығымен төленген, қайтарымсыз, табысталған, сублицензияланған" құқығы бар. Автор суретті Instagram-ға жариялай отырып, постты кіріктіруге рұқсатын береді. Яғни ол фотоны өзге сайттарға кіріктіруге сублицензия ұсынады.
Синклердің ойынша, Instagram-ның шарттары мұндай интерпретация үшін "түсініксіз" әрі "қарама-қайшы". Себебі Instagram мынадай дилеммаға душар етеді: фотоны өзге сайттардың жариялауына заңды түрде рұқсат беру немесе ең танымал фотосервисті пайдаланбау.
Сот мұндай проблеманың барын мойындады, бірақ ештеңеге көмектесе алмайтынын айтқан. "Сотқа арыз беруші Instagram-дағы парақшасына фотосурет жариялай отырып таңдауын жасады. Сот оны әлеуметтік желімен жасасқан келісімінен босата алмайды", - деп түсіндірген.