Физикадан 2019 жылы Нобель сыйлығына үш ғалым ие болды. Жеңімпаздардың есімі Нобель комитетінің салтанатты шарасында белгілі болды.
Нобель сыйлығына Джеймс Пиббл физика космологиясы саласында теориялық жаңалық ашқаны үшін лайық деп танылса, Мишель Майор мен Дидье Кело экзопланетаны тапқаны үшін марапатталды.
Жеңімпаздарды марапаттау іс-шарасы 10 желтоқсан күні Стокгольм қаласында өтеді. Бұл күні швециялық кәсіпкер әрі өнер тапқыш Альфред Нобель (1833–1896) көз жұмған еді. Биыл әрбір Нобель сыйлығының иегеріне 900 мың доллар сыйақы табысталады.
Бұған дейін медицина саласы бойынша Нобель сыйлығын алған ғалымдар анықталған еді. Америкалық ғалымдар Уильям Кэйлин, Грег Семенца және британиялық сэр Питер Рэдклифф медицина саласы бойынша Нобель сыйлығын алды. Олар адам жасушасының ауа тапшылығына бейімделуін зерттеген. Ғалымдардың бұл жаңалығы онкологиялық ауруларды емдеуге көмектеседі.