Қазақстандық кәсіпқой боксшы Мадияр Әшкеев мансабында алғаш рет жеңілістің кермек дәмін татты. Лос-Анджелесте өткен бокс кешінде америкалық Чарльз Конуэллмен жұдырықтасып, қарсыласына мықтылығын мойындата алмады.
Бокс кеші Wild Card Boxing аренасында өтті. Екі боксшы басты жекпе-жекте жұдырықтасты. Кездесу 9 раундта қазақстандық боксшы бапкерлері өтінішімен тоқтатылды.
32 жастағы Мадияр осыған дейін кәсіпқой бокста 14 кездесу өткізген. Оның 7-де қарсыласын нокаутпен ұтқан.
23 жастағы Чарльз Конуэлл де шаршы алаңда жеңіліп көрмеген. Кәсіпқой бокста 13 рет рингке шығып, бәрінде жеңіске жеткен.