Негізгі / Лайфстайл / Спорт / Жаңалықтар / Қазақстан шахмат федерациясының жаңа президенті сайланды
Қазақстан шахмат федерациясының жаңа президенті сайланды

Бүгін Қазақстан шахмат федерациясының (ҚШФ) кезектен тыс Құрылтайында ұйымның жаңа президенті болып Бейбіт Атамқұлов сайланды. Бұған дейін федерацияның президенті қызметін 2015 жылдың шілде айынан бастап Shakhmardan Yessenov Foundation ғылыми білім беру қорының құрылтайшысы және Алматы марафонының негізін қалаушы Ғалымжан Есенов атқарып келген болатын.

Ғалымжан Есенов

"Соңғы уақытта менің назарымды қажет ететін көптеген әлеуметтік жобалар пайда болды. Соның ішінде  2 спорт федерациясы мен ассоциациялары бар. Сондықтан мен әріптестеріме шахмат федерациясының жаңа президентін сайлау туралы ұсыныс жасадым. Біз спортшылардың, жаттықтырушылардың, ұйымдастырушылардың және менеджерлердің үздік командасын жинадық. Қазіргі таңда Қазақстан шахмат федерациясында барлық бизнес-үрдістер мен стандарттар жолға қойылған. Жаңа басшылықпен федерация алдағы уақытта да тамаша нәтижелер көрсетіп, жаңа белестерді бағындыратынына сенімдімін," - деп Ғалымжан Есенов құрылтай шешіміне түсініктеме берді.

Соңғы бес жылда әйелдер құрамасы командалық әлем чемпионатында бесінші және Дүниежүзілік шахмат олимпиадасында он бірінші орынға ие болды. Қазақстанда әлемнің ең үздік шахматшыларын жинаған ірі шахмат турнирлері өткізілді. Қазақстандық шахматшылар Азия чемпионаты, Азия ұлттары кубогы, жабық жайлардағы Азия ойындары сынды ірі халықаралық турнирлердің жеңімпаздары мен жүлдегерлері атанды.

"Ғалымжан Есенов басшылығымен осы уақыт ішінде шахмат федерациясы орасан зор жұмыстар атқарды. Шахматшыларымыздың қатары жаңа әлем чемпиондарымен толықты. Қазақстандық спортшылар халықаралық турнирлерден елімізге 202-ге жуық медаль алып келді", – деп ҚШФ-ның атқарушы директоры Ирина Грищенко толықтырып өтті.

Дайындаған: Massaget

Қосылған күні: 31 қаңтар, 21:50
Ұқсас жазбалар:
Динара Сәдуақасова әлемнің үздік 10 шахматшы әйелінің қатарына кірді Massaget.kz
Шахматтан 18 жасқа дейінгі Қазақстан чемпиондары анықталды Massaget.kz
Жасөспірімдер Олимпиадасында шахматшыларымыз үздіктер қатарынан көрінді Massaget.kz
Шахматтан Қазақстан чемпионаты рекорд орнатты Massaget.kz
Қазақстан құрамасы шахматтан сурдлимпиада ойындарынан алтынмен оралды Massaget.kz