Қазақ балуандары Польшада өткен халықаралық турнирде 8 медаль жеңіп алды

Қазақ балуандары Польшада өткен халықаралық турнирде 8 медаль жеңіп алды
Фото: wrestling.kz

Польша астанасы Варшавада еркін күрестен Вацлав Циолковский атындағы халықаралық турнир аяқталды. Қазақ балуандары 8 медаль жеңіп алды.

Жыл сайын дәстүрлі түрде ұйымдастырылып жүрген жарыста биыл қазақ балуандары жеңістің ең биік тұғырынан көріне алмады. 4 күміс, 4 қола медаль еншіледі. Финалға шыққан Қуат Әміртаев (61 кг), Амандық Бәкеев (70 кг), Нұрғали Нұрғайыпұлы (92 кг) және Мамед Ибрагимов (97 кг) қарсыластарына есе жіберді. Ал Нұрислам Санаев (57 кг), Дәурен Жұмағазиев (70 кг), Болат Сақаев (74 кг) пен Бақтияр Ізбасаров (79 кг) халықаралық турнирдің қола жүлдегерлері атанды.

Айта кетейік, Индонезияда өткен жазғы Азия ойындарында еркін күрес шеберлері 1 күміс 2 қола медаль еншілеп қайтқан болатын.

Ө. Сансызбай