Лейла Әли: Мен екеуінің де жанкүйерімін

Әйгілі боксшы Мұхаммед Әлидің қызы Лейла Әли орта салмақта WBC, WBA (Super) және IBO чемпиондық атағына ие отандасымыз Геннадий Головкин (38-0-1, 34 КО) мен мексикалық Сауль Альварес (49-1-2, 34 КО) арасындағы жекпе-жекке қатысты өз ойын білдірді.

- Мен Головкиннің де, "Канелоның" да жанкүйерімін. Қысқасы екеуінің де. Өзара екінші жекпе-жек ұйымдастырғанына қуаныштымын. Головкин жеңеді деп айту да қиын. Жеңілмегендер де жеңіледі. Кез келген боксшыны жеңуге болады. Мен бірінші кездесуден гөрі, екіншісі қызықты әрі тартысты болғанын қалаймын, - деді ESPN тілшісіне берген сұхбатында.

Лейла Әли кәсіпқой бокста 24 жекпе-жек өткізіп, барлығында жеңіске жеткен. Оның 21-де қарсыласын нокаутпен жеңген. Екінші орта салмақта IBA, WIBA және IWBF чемпиондық атақтарын иеленген. Мансабын 2007 жылы аяқтады.

Айта кетейік, Геннадий Головкин мен Сауль Альварес арасындағы алғашқы жекпе-жек өткен жылдың 17 қыркүйегінде өткен еді. Төрешілер шешімі бойынша екі боксшы тең тарқасқан-ды. Биылғы жекпе-жек 15 қыркүйекке белгіленіп отыр. Қысқасы 10 күннен кейін екі боксшы өзара мықтыны анықтайтын болады.

Жекпе-жек Лас-Вегастағы T-Mobile аренада өтеді. Отандасымыз чемпиондық атағының барлығын қорғайды. Сондай-ақ иесіз тұрған The Ring чемпиондық атағы мен WBC ұйымының арнайы белбеуі де жеңімпазға табысталады.

GGG мен "Канело" шаршы алаңға шығатын бокс кешін Qazaqstan мен QazSport арналары тікелей эфирде көрсетеді.