Кәсіпқой бокс шаршы алаңында қазақ боксшы қыздары да бой көрсете бастады. Фируза Шарипова осыған дейін бірнеше жекпе-жек өткізіп, ел абыройын асырып жүрсе, бұл жолды Зарина Цолоева да жалғамақ.
Америкалық әйгілі әртіс Анджелина Джолиге ұқсағандықтан оны жұрт "қазақстандық Джоли" деп атап кеткен.
Заринаның жекпе-жегі 2 қарашада АҚШ-тың Луизиана штатындағы Рейне қаласында өтеді.
BoxRec мәліметінше, қазақстандық боксшы қыздың қарсыласы - Селина Барриос. 24 жастағы америкалық боксшы қыз әлі жеңілмеген. Екі кездесу өткізіп, екеуінде де жеңіске жеткен. Бір кездесуін уақытынан бұрын аяқтаған.
Жеңіл салмақтағы қос боксшы арасындағы жекпе-жек Civic Center аренасында өтеді. Кездесу 4 раундқа жоспарланған.
Зарина Цолоева шаршы алаңға шығатын бокс кешінде қазақстандық Еділ Қожамбердиев те жекпе-жек өткізеді. Осыған дейін кәсіпқой бокста бір жекпе-жек өткізіп жеңіске жеткен отандасымыздың қарсыласы – америкалық Блэйк ЛаКейз (4-3-1, 1 КО).