Тамыздың 11-і мен 13-і аралығында Алматы облысының Талғар ауданындағы ат спорты кешенінде өткен шөгеннен ІІ Қазақстан чемпионаты өз мәресіне жетті. Бұл туралы Қазақстан шөген қауымдастығының баспасөз қызметі хабарлады.
Үш күнге созылған ел біріншілігінде алты команда бақ сынады. Олар: Оңтүстік Қазақстан облысы шөген федерациясының командасы, Ақмола облысы шөген федерациясының командасы, Аққия шөген клубы, Әулиеата шөген клубы, «Astana polo club» пен «Almaty polo club» командалары.
Жарыста үшінші орын үшін таласта Әулиета шөген клубы мен Ақмола облысы шөген федерациясының командалары өзара мықтыны анықтады. Тартысты өткен кездесуде 2-1 есебімен былтырғы чемпиондар Әулиеата шөген клубы жеңіске жетті.
Финалда «Astana polo club» пен «Almaty polo club» командалары чемпиондық атаққа таласты. Бірнеше халықаралық турнирлердің жеңімпаздары қос командада жиналғандардың делебесін қоздырды. Қорытынды есеп 6-4. «Astana polo club» командасының пайдасына шешілді.
Сондай-ақ чемпионаттың «үздік ойыншы» номинациясына «Almaty polo club» командасының капитаны Қуаныш Мұсабековке бұйырды. Ал, «үздік поло пони» болып «Маусым» атты сәйгүлік танылды. Тиісінше Аққия шөген клубы 5 орынға ие болса, Оңтүстік Қазақстан облысы шөген федерацисының командасы 6 орыннан көрінді.
Жарыстың жүлде қоры 2 миллион теңге болатын. Жарыс жеңімпаздары 1 миллионға ие болса, ІІ орын алған «Almaty polo club» командасы 600 мың теңге, Әулиета шөген клубы 400 мың теңге сыйақыға ие болды.