"Қайрат" бірінші ойында "Скендербеумен" тең түсті (видео)

"Қайрат" футбол клубы Еуропа лигасының екінші іріктеу кезеңіндегі "Скендербеуге" қарсы бірінші ойында қарсыластарымен 1:1 есебімен тең түсті. Алматыдағы ойында алаң иелері есептегі басымдығын сақтап қала алмады.

Ойында бірінші болып 10 минутта Жерар Гоу "Қайратты" алға шығарды. Албаниялық команда шабуылда ширақ ойнап, бірінші таймда-ақ таразы басын теңестіруге ұмтылды. Кахабер Цхедадзе шәкірттері қарымта шабуылға иек артумен болды.

Екінші таймда "Скендербеу" ойыншылары есепті теңестіре білді. 72 минутта Бакари Нимага "Қайрат" қақпасы алдындағы қарбаласта гол соғып, командасына маңызды нәтиже сыйлады. Ойын аяқталғанша "Қайрат" командасы ойыншыларының кезекті рет есепте алға шығуына мүмкіндігі болғанмен, сәттілік серік болмады.

Қос команда арасындағы қарымта ойын шілденің 20-нан 21-не қараған түні Албанияның Корчи қаласында өтеді.