Роналдиньо ойыншылары қаза болған «Шапокоэнсе» клубында ойнауы мүмкін
Әйгілі бразилиялық ойыншы Роналдиньо жақында ғана әуе апатынан ойыншылары қаза болған «Шапокоэнсе» клубында бақ сынауы мүмкін. Бұл туралы футболшының ағасы әрі агенті Роберто Ассис хабарлады.
- Қазір клуб үшін ең ауыр кезең. Алдағы уақытта командадан ұсыныс түссе, қарсы емеспіз. Роналдиньо көмек қолын созуға дайын. Барлық бразилиялықтар қаза тапқандардың отбасына қайғыра көңіл айтады. Біз біргеміз, - деді Роберто Ассис.
Айта кетейік, бразилиялық команда Медельинге Оңтүстік Америка кубогының алғашқы финалдық ойынына қатысу үшін ұшып бара жатқан жолда апатқа ұшыраған еді. Команданың 19 ойыншысы мен жаттықтырушылары қаза тапқан-ды.
Бразилиялық командада Роналдиньодан өзге 38 жастағы аргентиналық ойыншы Хуан Роман Рикельме де ойнауға дайын екендігін мәлімдеп отыр.
Осыған дейін бразилиялық клубтың басшылары бірнеше жылға тегін бір-бір футболшыдан беруге дайын екендіктерін хабарлаған болатын. Сондай-ақ олар «Шапокоэнсе» клубы Бразилияның жоғарғы біріншілігінде 3 жылға дейін көрсеткен нәтижесіне қарамай, өз орнын сақтап қалуын ұсынған еді. Ал финалда ойнауы тиіс болған Колумбияның «Атлетико Насьональ» командасы бразилиялық ұжымды жеңімпаз ретінде таныды.
Ө. Сансызбай