Чилиде "Дакар-2014" ралли-марафонының 11 кезеңі мәресіне жетті. Ауыр жүк көліктері арасында Ардавичус экипажы екі сатыға көтерілді.
Жол талғамайтын көліктер арасында француз Стефан Петерансель («MINI») топ жарды. Екінші болып катарлық Нассер Салех Аль-Аттия келсе, үшінші болып мәре сызығын испандық Хоан Нани Рома кесті. «Proto Overdrive» автокөлігімен бақ сынайтын Айдын Рахымбаев пен Владимир Демьяненко 11-ші кезеңді 21-ші орынмен қорытындылады. Ал Денис Березовский мен Игнат Фальков 41-ші сатыдан көрінді.
Ауыр жүк көліктері арасында нидерландылық Жерар де Рой («Ивеко») бірінші болып келді. Ол барлық жолды 4 сағат 10 минут 24 секундта басып өтті. Екінші орын «КАМАЗ-мастер» экипажы ресейлік Андрей Каргиновқа бұйырды. Үшінші орын да оның жерлесі Эдуард Николаев еншісінде қалды. Ал қазақстандық Артур Ардавичус, Алексей Никижев және Радим Капланек («Tatra») экипажы 12-ші орыннан көрінді.
Жалпы есепте жол талғамайтын көліктер арасында Айдын Рахымбаев пен Владимир Демьяненко экипажы 18-ші сатыда болса, Денис Березовский мен Игнат Фальков жұбы 37-ші орында келеді. Ал ауыр жүк көліктері арасында Ардавичус бастаған жігіттер 2 саты жоғарылап, 14-ші орынға көтерілді.
Бүгін Ла-Серена мен Вальпараисо арасын жалғайтын «Дакар-2014» ралли-марафонының соңғы кезеңі өтеді.
Дайындаған: Өмірбек Сансызбай
Сурет: vk.com