Жүгіру алдында қалай тамақтану керек?
Жаз мезгілінде жүгіріп жүрген адамдарды жиі көзіміз шалады. Әркімнің белгілі бір мақсатта шынығып жүргені рас. Біреулер артық салмақтан арылу үшін жүгірсе, біреулер дене бұлшықеттерін қалыпқа келтіру үшін, енді бір топ адам кәсіби түрде жүгірумен айналысады. Бірақ, жүгіру алдында да ескеретін дүниелерді естен шығармау керек. Жүгіруге уақытың мен құлқың табылғанымен, шынығу алдындағы басты ережелердің бірі – дұрыс тамақтану екенін ұмытпаған абзал.
Жүгіру алдындағы дұрыс тамақтану бұлшықеттердің энергетикалық субстрат жағдайын жақсартып, жаттығу сәтінде оң пайдасын тигізеді. Тез шаршап қалмаудың алдын алады. Бойдағы күш-қуатты тиімді пайдалануыңа мүмкіндік туады. Ал ол үшін жүгіру алдындағы тамақтанудың құпияларымен таныс болуымыз керек.
Жүгіру алдында тамақтану
Жүгіру алдындағы тамақтану, ең бірінші сіздің қанша уақыттан бері жаттығып келе жатқаныңызбен байланысты. Егер сіз жүгіруді енді ғана бастағалы отырсаңыз, ақуызы мол, дәрумендерге бай тағамдармен тамақтануыңыз қажет. Таңда жүгіретін болсаңыз, ақуызы мол тағамдарға қайнатылған жұмыртқа, омлет, майы алынған айран және сырды дастарқаныңызға қойғаныңыз дұрыс.
Егер сіз кәсіби түрде жүгірумен айналысып жүрген болсаңыз, ақуызы мол тағамдармен қоса түрлі жеміс-жидектермен және қуат беретін дәрі-дәрмектерді де мөлшерімен пайдалансаңыз болады. Бұл сәтте дәрігер немесе бапкер ақылын серік еткеніңіз дұрысырақ.
Жүгіруге бір жарым сағат уақыт қалғанда көмірсулары мол тағамдармен тамақтануға кеңес береміз. Олардың қатарына шоколад, кептірілген жеміс-жидектер, макарон, күріш пен балды жатқызуға болады. Аталған тағамдар денеге қажетті қуатты қамтамасыз ете алады.
Жүгіру алдында картоп, капуста, саңырауқұлақ, шалғам, дән және бұршақ тұқымдас азық-түлік өнімдерінен жасалған тағамдармен тамақтануға болмайды. Сонымен қатар, майлы тағамдар (ет тағамдары, қуырылған ас) жеуге де асықпаңыз. Өйткені, жүгіру сәтінде ішкен тамағыңыз ағзаңызға кері әсерін тигізеді.
Жүгіріп келе жатып бүйрегіңізге салмақ түскенін, жүрек тұсындағы бұлшықеттердің талғанын сезінсеңіз, келесі жолы жаттығу алдында суды көп ішпеңіз. Жаттығуға 30 минут уақыт қалғанда өзіңізді судан шектеңіз, және оған дейін 200 мл-нан артық ішпеңіз. Ал ол уақытқа дейін тәтті қосылған шай немесе газдалмаған су ішкен дұрыс.
Дұрыс тамақтану сіздің жоғары нәтиже көрсетіп қана қоймай, сонымен қатар, ауру-сырқаудан аулақ болуыңызға сеп болады. Ал біз ертең жүгіруден кейін қалай тамақтану керек екенін айтатын боламыз.
Дайындаған: Өмірбек Сансызбай
Сурет: talasoponiente.blogspot.com, Өмірбек Сансызбай
Ұқсас жазбалар:
Жүгіруді жаңа бастағандарға кеңестер
О. Сансызбай