Бразилия әлем рекордын жаңартып, ширек финалға шықты

Бразилия әлем рекордын жаңартып, ширек финалға шықты
Фото: Reuters

Бразилия құрамасы Катардағы әлем чемпионатының ширек финалына жолдама алды, - деп хабарлайды Massaget.kz тілшісі.

1/8 финалда бразилиялықтар Оңтүстік Кореямен кездесті. Матч тағдыры бірінші таймда шешіліп қойды. Бразилия футболшылары үзіліске дейін төрт гол соғып тастады.

7-минутта Винисиус Жуниор матч есебін ашты. Бес минуттан соң Неймар пенальтиден есепті еселеді. Ал 29-минутта Ришарлисон Бразилияның әдемі комбинациясын голмен аяқтады. 36-минутта Лукас Пакета бразилиялықтардың тағы бір голын соқты.

Екінші таймда корей футболшылары есеп айырмасын қысқарта алды. 76-минутта Бэк Сын Хо алыстан дәл соққы жасады. Бірақ Оңтүстік Кореяның одан әріге шамасы жетпеді. Қорытынды есеп - 4:1.

Бұл ойында Бразилия құрамасы әлем чемпионатының рекордын орнатты - мундиальде 113-матчін өткізді. Олар бұл көрсеткіш бойынша Германиядан (112 матч) озды.

Енді Бразилия ширек финалда Хорватиямен кездеседі.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!

Е. Төлеш