Күшіміз – бірлікте

Қазақстан халқы Бірлігінің күніне арналған «Туған еліме тілегім» атты мерекелік концерт «Астана Опера» театрының Үлкен залында 1 мамырда өтеді. Кеш операның жетекші солистерінің, Қазақстанның еңбек сіңірген қайраткері Абзал Мұхитдинов басқаратын «Астана Опера» Симфониялық оркестрінің қатысуымен ұйымдастырылады. Режиссері – Наталья Кагадий.

Көрнекті опера солистері – Жанат Шыбықпаев, Бейімбет Таңарықов, Бибігүл Жанұзақ, Айзада Қапонова, Татьяна Вицинскаясияқты тағы басқа қазақ, армян, орыс, башқұрт, италия, испан, француз және өзге тілдердегі шығармаларды орындайды. Мерекелік концертті хор және балет әртістерінің қатысуымен А.Жұбанов пен Л.Хамидидің «Абай» операсынан сахналық көрініс ашады. Концерт соңында қазақ опера және балет өнерінің үздік туындылары ұсынылады.

– Орындаушылар өздерінің кәсіби шеберлігімен қатар қазақ мәдениетіне деген сүйіспеншілігі мен құрметін, сондай-ақ өзінің ұлттық мәдениетінің ерекшелігін көрсете алатын мұндай мерекенің болғаны қандай жақсы. Мысалға алатын болсақ, Арменияның халық әртісі Барсег Туманян қазақ тілінде А.Жұбанов пен Л.Хамидидің «Абай» операсынан Сырттанның ариясын және  армяндық операдан алынған арияны ана тілінде орындайды. Башқұртстанның еңбек сіңірген әртісі Әлфия Кәрімова башқұрт халық әні «Сандуғашты» шырқайды. Балет әртістері Б.Асафьевтің «Бақшасарай бұрқағы» балетінен татар биін және В. Соловьёв-Седойдың «Тарас Бульба» балетінен «Гопак» украиндық биін билейді. Концерттің түпкі мақсаты – Қазақстанға деген шынайы сүйіспеншілік сезімін білдіру, – деп атап өтті Наталья Кагадий.   

Мереке 1996 жылдан бастап атап өтілетінін ескерте кетсек. 1995 жылы 18 қазанда Қазақстан Республикасының Президенті Нұрсұлтан Назарбаев 1мамыр күнін Қазақстан халқының Бірлігі күні деп жариялау туралы жарлыққа қол қойды. Ұлтаралық және дінаралық келісімді сақтау біздің еліміздің негізгі басымдықтарының бірі. Халықтар достығы, бейбіт күн – міне, бұл табысты шығармашылық пен өнердің гүлдену негізі.