Негізгі / Лайфстайл / Мәдениет / Музыка / Алматыда Шәмші Қалдаяқовтың ескерткіші ашылды
Алматыда Шәмші Қалдаяқовтың ескерткіші ашылды

Алматыда қазақ вальсінің королі, композитор Шәмші Қалдаяқовтың ескерткіші ашылды. 

Ескерткіш Республика сарайының солтүстік жағында қойылды. 

“Шәмші ағамыз өзінің әндерін жастарға да, жастардың маххабатына да, думанға да, ел абыройын асқақтататын жағына да бағыштаған. Ол әндерімен әр шаңырақты тербетіп қойған жоқ. Бүкіл қазақ жерін тербетті. Ел тәуелсіздік алған соң халық әртісі атағын алды. Ал бірақ халқы оның атағын одан әлдеқайда бұрын берген. “Қазақ вальсінің королі” деген. Ондай атаққа жететін атақ жоқ. Бұл – елдің, халықтың сүйспеншілігі”, - деді қала әкімі Бақытжан Сағынтаев.

Ескерткіштің ашылуына өнер саласындағы азаматтар, өнерсүйер қауым, қаланың зиялы қауым өкілдері, композитордың жұбайы Жәмила Қалдаяқова және ұрпақтары келді.

Ескерткішті салтанатты түрде Бақытжан Сағынтаев пен композитордың жары Жәмилә Қалдаяқова ашты. Ескерткіштің биіктігі - 1,5 метр, ұзындығы - 2,8 метр. Оны бес мүсінші жасаған.

“Бүгін сондай құтты күн. Келіп, бас иіп құттықтап келгендеріңізге рахмет. Шәмші Қалдаяқов халықтың сүйген композиторы, бақытты жан. Маған “Жәмила, мен өте бақытты адаммын, мені халық жақсы көреді, барған жерімде құрметтейді” деп айтатын”, - деді Жәмила Қалдаяқова.

Дайындаған: Тұрсынбек Раушанұлы
Фото: tengrinews.kz
Қосылған күні: 07 қараша, 15:53
Ұқсас жазбалар:
Шәмші сүйген арулар Massaget.kz