Рэперге Пулитцер премиясы табысталды

Рэперге Пулитцер премиясы табысталды

Рэпер Кендрик Ламар музыка бағыты бойынша Пулитцер премиясына лайық деп танылғанын хабарлаған едік. Күні кеше оны марапаттау рәсімі болып өтті.

Мұндай марапат музыканттың былтыр жарық көрген DAMN. аталатын альбомы үшін берілді. Бұл бұрын соңды болмаған оқиға.

Былтыр Нобель марапатын Боб Дилан алғаннан соң, музыканттарға әдеби сыйлықтың берілуі соншалық үлкен жаңалық болудан қалған сияқты. Десе де, әдетте жоғары марапатқа не джаз не классикалық саз бағытына жататын туындылар лайық деп танылып жататын. Рэптің де өнер ретінде ресми бағаланатын дәуірі келген секілді. Бұл дәуір Тупак Шакур өлгенде басталуға тиіс болатын.

Альбомға "заманауи афро-америкалық өмірдің бар қиындығын бір басына тоғыстырған және ритмдік динамизммен айрықшаланатын әндер жиынтығы" деген сипаттама берілген.

Естеріңізге сала кетейік, Ламардың DAMN. аталатын альбомы "Грэмми" премиясына үздік альбом ретінде ұсынылып "Үздік рэп-альбом" атағын жеңіп алды.

А. Оралқызы