Алғашқы қазақ-қытай бірлескен жобасы – "Композитор" фильмі Лос-Анджелесте өткен Golden Screen Awards жүлдесінің 4 бірдей сыйлығына ие болды. ҚР Мәдениет және спорт министрлігінің тапсырысы бойынша Ш.Айманов атындағы "Қазақфильм" киностудиясы, Shinework Pictures және China film coproduction corporation қытайлық компаниялар бірлесіп түсірген кинотуынды "Үздік ко-өнімдегі фильм", "Үздік әйел адам рөлі" (актриса Аружан Жазылбекова), "Үздік ер адам рөлі" (актер Ху Чжунь) және "Үздік музыка" сыйлықтарымен марапатталды.
- Мен өте бақыттымын. "Қазақфильм" киностудиясы мен фильмнің түсіру тобына алғысымды білдіремін, - деп жазды актриса Аружан Жазылбекова өзінің Instagram-дағы парақшасына.
Публикация от Aruzhan Jazilbekova (@arujazz)10 Ноя 2019 в 9:35 PST
Естеріңізге сала кетсек, осы жылы маусым айында қазақстандық прокатқа шыққан фильмі қытайлық композитор Си Синхайдың Совет одағында, оның ішінде Алматыға эвакуацияланған кезі мен қазақтың композиторы Бақытжан Байқадамовпен достығы туралы баяндайды.
Фильмнің әлемдік тұсаукесері IX Бейжің Халықаралық кинофестивалінің (The 9th Beijing International Film Festival) конкурстық бағдарламасы аясында өтті. Сондай-ақ бұл картина ХХІІ Шанхай халықаралық кинофестиваліне қатысып, 2 марапатқа лайық деп танылды. Композитор Бақытжан Байқадамовтың жиенінің рөлін сомдаған жас қазақстандық актриса Ділнәз Нұрсейіт "Үздік жаңа есім" аталымында қытайлық CCTV-6 телеарнасының жүлдесіне ие болса, фильмінің продюсерлік тобы ұйымдастыру комитетінің құрметті сыйлығын алды.
Golden Screen Awards жүлдесі 2016 жылдан бері өткізіліп келеді. Ұйымдастырушылар: Көркем фильмдердің қауымдастығы (MPA), Қытайдың ко-өнімдер корпорациясы (CFCC), Американдық кино өндірісі мен телеарналар көрмесі (UCFTI) және Hollywood Reporter басылымы.
Си Синхай қысқа ғұмырында 500-ден астам тамаша әуендер жазған, сондай-ақ ол 10-ға жуық кинофильмдер музыкасының авторы. Алматыда өткізген жылдары ол "Ұлт азаттығы" симфониясын жазған. Азаттық пен отанға деген адалдықты жырлап, зорлық-зомбылық пен соғысқа қарсы бағытталған Си Синхайдың шығармаларынан отанға деген махаббатын аңғаруға болады.