"Аладдин" анимациялық фильмінің жаңа трейлері жарияланды

"Аладдин" анимациялық фильмінің жаңа трейлері жарияланды
Фото: vk.com

Режиссер Гай Ричи бастаған түсірілім тобы Disney студиясының 1992 жылы жарыққа шыққан "Аладдин" анимациялық фильміне ремейк жасауға талпынған еді. Өткен жылдың қазан айында әлі экранға шығып үлгермеген жаңа туындының трейлері әлеуметтік желілерге жүктелген болатын. Енді соның екінші нұсқасы жарияланды.

Картинада Жасминді Наоми Скотт, Джин рөлін Уилл Смит, ал Аладдинді Мена Масуд сомдаған. "Аладдин" картинасының сценарийін "Алып балық" және "Чарли мен шоколад фабрикасы" фильмдері түсірілімдерінде жұмыс істеген Джон Огаст жазған. Дэн Лин фильм продюсері болып тағайындалды.

Естеріңізге сала кетейік, осыдан жиырма бес жыл бұрын толықметражды «Аладдин» мультфильмі жарыққа шықты. Барша әлемге танымал Шығыстық сарындағы жалғыз балалар фильмі бірнеше буынның сүйікті картинасына айналды. Аладдин туралы ертегі Еуропада алғаш рет  «Мың бір түн» оқиғасы арқылы келді. Антуан Галланның он екі томдық аудармасы Батыс жұртшылығына Шығыс әлемін ашты.

1988 жылы драматург Говард Эшман ертегіні экранизациялауды қолға алады. Ол оқиғаны қарапайым халыққа түсінікті ету мақсатында 40 беттік сценарий жазады. Эшман өзінің досы Алан Менкенмен бірге ертегіге мюзикл жазады.

Бірақ, студия басшылығы жобаны тоқтатып қояды да, Эшманға "Сұлу мен құбыжық" мультфильмін қолға алуды бұйырады. Эшман 1991 жылы өмірден өткен соң, мультфильм сюжеті оның сценарийінен айтарлықтай ауытқыды. 80-шы жылдарда ол жобаға арнап 14 ән жазған екен, мультфильмге соның үшеуі ғана енген.

Бірақ, Эшманның еңбегі елеусіз қалды деуге келмес, себебі, картина шығып, көпшіліктің сүйікті мультфильміне айналғанымен қоса, "Аладдин" үздік музыка мен үздік ән (A Whole New World) үшін екі мәрте "Оскар" марапатын алды. 

А. Оралқызы