«Қазақ газеттері» ЖШС-ға жаңа басшы тағайындалды

«Қазақ газеттері» ЖШС-ға жаңа басшы тағайындалды
Фото: alashainasy.kz

«Қазақ газеттері»  жауапкершілігі  шектеулі серіктестігінің  жаңа  басшысы болып Паттеев  Шәмшидин Әшенқожаұлы  тағайындалды. 

Шәмшидин Әшенқожаұлы Паттеев 1960 жылы 12 қаңтарда Оңтүстік Қазақстан облысында дүниеге келген. 1978 жылы Түркістан қаласындағы орта мектепті жақсы тәмамдаған ол, еңбек жолын киелі Қожа Ахмет Яссауи кесенесі жанындағы мұражайдың кіші ғылыми қызметкері болып, жөндеу қызметіне қатысудан бастады. 1984 жылы Киров атындағы Қазақ мемлекеттік университетінің журналистика факультетін бітірген.

1988-1991 жылдар аралығында «Өнер» баспасында редактор, 1991-1994 жылдар аралығында «Алдаспан» жастар шығармашылық бірлестіктері қауымдастығының бас директоры болып қызмет атқарған. 1997 жылдан бері халықаралық «Түркістан» газетінің бас редакторы қызметін атқарды. Осы уақыт аралығында ол қалыпты газет шығаруға ұйытқы болып қана қоймай, басылымның жаңа тұрпаттағы келбетін жасады. Газет бетінде түрлі қоғамдық мәселелерге салиқалы сараптама жасауды тілшілерден үнемі талап етіп отыратын басшы ретінде ол «Түркістан» газетінің республикалық қазақ тілді газеттер арасындағы абырой-беделін жоғарылатып, басылым танымдылығын арттыра түсті.

Шәмшидин Әшенқожаұлының  қоғамдық пікірталастарда, түрлі БАҚ-тар арқылы мемлекеттік тіл, оралмандар тағдырына орай айтып жүрген сүбелі ойлары ұдайы көпшіліктің қолдауына ие.

Қазақстан Республикасының Еңбек сіңірген Мәдениет қайраткері, «Құрмет» орденінің иегері, «Қазақстан Республикасының Тәуелсіздігінің 10 жылдығы», «Астананың 10 жылдығы» медальдарымен марапатталған.

Ж. Жұмағұлов