Қазақстанның үздік педагогтары Қостанайда марапатталды

Қазақстанның үздік педагогтары Қостанайда марапатталды

Бүгін Қостанайда мұғалімдердің кәсіби мерекесі қарсаңында "Үздік педагог – 2021" республикалық байқауының қорытындысы шығарылды. Бұл туралы ҚР Білім және ғылым министрі Асхат Аймағамбетов Facebook желісіндегі парақшасында жазды. 

2020 жылдың қаңтарында Мемлекет басшысы Қасым-Жомарт Кемелұлы Тоқаев "Педагог мәртебесі туралы" Заңға қол қойды. Президенттің қолдауының арқасында және осы Заңның қабылдануының нәтижесінде біз мұғалімдердің жалақысын арттырып, педагогтерді өзіне тән емес функциялардан босату бойынша жұмыс жүргіздік.

Бүгін еліміздің түкпір-түкпірінен келген 64 мұғалім "Үздік педагог-2021" атағына ие болды. Педагогтердің әрқайсысы 1000 АЕК көлемінде сертификатпен және "Үздік педагог" төсбелгісімен марапатталды. Сонымен қатар ақшалай сыйақылар жергілікті атқарушы органдар тарапынан да бекітілді. Бұл күні 10 педагог "Еңбек ардагері" медалімен және "Ы. Алтынсарин", "Білім беру ісінің құрметті қызметкері" төсбелгілерімен марапатталды. Педагогика саласының еңбек ардагерлеріне де құрмет көрсетілді, - деп жазды. 

Салтанатты іс-шараның Қостанай жерінде өтуінің де өз сыры бар. Мұны министр өз жазбасында түсіндіре кетті. 

Биыл оныншы рет өтіп жатқан мерейтойлық рәсім Қазақстан Тәуелсіздігінің 30 жылдығы қарсаңында ұйымдастырылып, аса көрнекті ағартушы, педагог Ыбырай Алтынсариннің 180 жылдығымен тұспа-тұс келді. Осыған байланысты біз іс-шараны ұлы ағартушының туған жерінде өткіземіз деп шешім қабылдадық, - дейді.

Асхат Аймағамбетов барлық жеңімпазды құттықтап, алғысын білдірді. 

Барлық жеңімпазды лайықты марапаттарымен құттықтаймын! Қажырлы еңбектеріңіз бен мамандыққа деген адалдықтарыңыз үшін алғыс айтамын, - деді министр өз жазбасында.