Академик Төрегелді Шарманов сыйлығының І тоқсандағы қорытындысы шықты

Академик Төрегелді Шарманов сыйлығының І тоқсандағы қорытындысы шықты

Академик Төрегелді Шарманов сыйлығына арналған байқаудың І тоқсандағы қорытындысы бойынша жеңімпаз анықталды. Конкурсқа қатысушылардың  ішінен мұғалім-дефектолог Әсел Маралбектің dalanews.kz порталына шыққан "Аутизмді ерте анықтау – жақсы нәтижеге қол жеткізеді" мақаласы конкурстық коммиссия мүшелерінің шешімі бойынша үздік атанды.

Бұл сыйлық медицина және денсаулық саласы бойынша қазақ тілінде жарық көрген өзекті материалдарға әр тоқсан сайын тағайындалады. Жеңімпазға "Төрегелді Шармановтың халықаралық қоры" ҚҚ атынан арнайы ақшалай сыйақы мен диплом табысталады.

Академик Төрегелді Шарманов атындағы сыйлықтың ІІ тоқсанына өтінім беру басталды. Материалдарды қабылдау 30 маусымға дейін жалғасады.

Конкурсқа денсаулық сақтау және түрлі аурулардың алдын алу, сондай-ақ денсаулық пен медицинаға қатысты қызықты және маңызды ақпараттарды қамтитын қазақ тіліндегі жобалар немесе бұрын жарияланған материалдар қабылданады. Материалдар қысқа ғылыми-көпшілік мақала, шағын бейнеролик, комикс немесе инфографика форматында болса қатыса алады.

Бұл сыйлықты тағайындау критерийлері ретінде материалдың өзектілігі мен пайдасы, жарияланымның ғылыми негізділігі және анықтығы, түпнұсқа буын және презентация стилі, медициналық білімі жоқ оқырмандардың түсінуіне оңай болуы, тақырыбын қамту деңгейі (сайттағы оқылым саны, әлеуметтік желілердегі белсенділік, оқырмандармен қарым-қатынас), барлық авторлық құқықты сақтау (плагиаттың болмауы) сияқты талаптар қойылады.

Жазбаша материалдағы көлем талабы – 1000-нан 4000-ға дейін баспа белгісі, ал YouTube-тегі видеолар үшін талап – ұзақтығы 5 минутқа дейін.

Бұл сыйлықты берудегі мақсат – медицина және денсаулыққа қатысты өзекті мәліметтерді баршаға, әсіресе қазақ тілді оқырманға кеңірек жеткізуге бағытталған тақырыптағы материалдарды қолдау. Аталмыш сыйлық туралы, іріктеудің негізгі талаптары, сыйлықақы мөлшері және өтінім беру мерзімдері туралы толық ақпаратты осы сілтемеге өтіп оқи аласыздар.

Қосымша сұрақтар туындаған жағдайда 8 702 575 76 48 телефон нөміріне немесе sharmanovfund@gmail.com электрондық почтаға хат жолдасаңыз болады.

Н. Үсенова