Дұрыс тыныс алу сиқыры: Қобалжуды тез басуға көмектесетін техника

Дұрыс тыныс алу сиқыры: Қобалжуды тез басуға көмектесетін техника

Ішкі әлеммен жұмыс жасау маманы Катя Джейкобс кез келген басқа маңызды оқиға алдында болатын қобалжуды жеңіп, тез тынышталуға көмектесетін қарапайым әдіспен бөлісті. Презентация қорғау алдында басыңыз айналып бара жатқанын сезесіз бе? Маңызды кездесуде өз ойыңызды жинақтай алмайсыз ба? Қандай да бір «ыңғайсыз әңгімеден» тынысыңыз тарыла ма?

Мұның бәрі дененің қорғаныс амалдары. Дене миыңыздағы мазасыздыққа осылай жауап береді. Ми қауіп сигналдарын жіберіп, ағзаның өзін сақтап қалуы үшін жұмыс жасайтын жоғары дабыл режимі қосылады: адреналин жоғарылайды, тыныс алу тездейді, терлеу күшейеді, бұлшықеттер қатайып, жүрек соғысы артады. Осылайша бағалы энергия ресурстары босқа кетеді екен.

Сонымен қатар, бұл күйде біз инстинктке көбірек назар аудара отырып, рационалды ойлай алмаймыз. Сондықтан тыныштық күйіне оралу маңызды. Мұны әр түрлі жолмен жасауға болады: жалбыз қосылған шай ішу, лаванда бұтағының иісін сезу, жылы ванна қабылдау. Бірақ бізде мұндай мүмкіндік үнемі бола бермейді.

Сіздермен тыныс алудан басқа ештеңені қажет етпейтін оңай әдіспен бөлісе өтейік. Бұл 4-7-8 тыныс алу техникасы. Оның мәні мынада: дұрыс де малу арқылы біз өз санамызда қауіпсіздік сезімін қалыптастырамыз. Бұл ағзадағы қауіп сигналдарын бейтараптандырады және біз табиғи тыныш күйімізге ораламыз. Бұл тым қарапайым сияқты көрінуі мүмкін. Бірақ оған қарамастан, 4-7-8 техникасы мінсіз жұмыс істейді. Өзіңіз дәл қазір жасап көріңіз және әсерін сезініңіз.

Өзгерістерді байқау үшін техниканы қолданар алдында және одан кейінгі күйіңізді бақылауды ұмытпаңыз. Ыңғайлы жайғасып, кеудеңізді түзеп, арқаңызды тік ұстаңыз. Алаңдамау үшін көзіңізді жұмыңыз.

Тыныс алуды бақылауды бастаңыз. Айтпақшы, сіз бұл техниканы зейінді жаттықтыруға және назар салуға қолдана аласыз. Ал назар қайда бағытталса, энергия сонда ағады.

Жаттығуға бейімделіңіз, бірнеше терең, еркін дем алыңыз, содан кейін өзіңізге ырғақты есептей отырып, тыныс алуды бастаңыз:

 

1, 2, 3, 4 кезінде мұрынмен дем алыңыз

 

1, 2, 3, 4, 5, 6, 7 осы уақыт бойы демді ішіңізде ұстаңыз

 

1, 2, 3, 4, 5, 6, 7, 8 -де мұрын арқылы немесе ерін арқылы дем шығарыңыз. 

Содан кейін циклды басынан бастап қайталаңыз. Баяу дем алыңыз, қорқыныш пен үрейден арылыңыз. Дем алу мен дем шығару арасындағы үзілісте тыным тапқаныңызды аңғарасыз.

Мұны бірнеше мәрте қайталаңыз, содан кейін өз сезіміңізді жоғарыда сипатталғандай қайтадан бақылаңыз. Өзіңізге ыңғайлы болуы үшін телефонға уақыт есептеуіші бар кез келген қосымшаны жүктей аласыз және керек темпті орната отырып, телефондағы кері санақты қоса аласыз. Егер сіз тыныс алу кезінде ауырлық сезсеңіз, жылдамдатыңыз, ал егер толық дем алуға үлгермесеңіз, керісінше жылдамдықты азайтыңыз.

Бұл техниканың ерекшелігі - сіз мұны кез келген жерде, кез келген уақытта, кез келген жағдайда және басқаларға байқатпай жасай аласыз. Сонымен қатар, оның қарсы көрсетілімдері мен жанама әсерлері жоқ. Келесіде маңызды шара алдында, сахнаға шығарда немесе жиналысқа барғанда, 4-7-8 техникасын қолданып, сенімділік пен жан тыныштығынан ләззат алыңыз.