Болашаққа пайдасы мол хоббилер

Болашаққа пайдасы мол хоббилер
Фото: newkaliningrad.ru

Күнделікті күйбең тіршілік, бір қалыпты өмір, адамды жалықтырып жібереді. Жұмыс, үй, серуендеу, ұйықтау  барлығы күнделікті қайталанып отырады. Зерігіп кеткен жандар басқа істерге қызығып, өзіне таңсық істермен айналысқысы келеді. Шұғылданатын жұмыстар көп болғанымен, олардың болашақта сізге алып келер пайдасы шамалы. Сондықтан, алдағы уақытта ойлау қабілетіңізге, өмір сүруіңізге тиімді хоббилерді ұсынамыз.

Ең бірінші хобби таңдамас бұрын, оның қаншалықты пайдалы екеніне назар аударғаныңыз дұрыс. Одан кейін сіздің өміріңіз үшін оның қаншалықты маңызы бар екенін есептеңіз. Босқа өткен уақыт талай нәрседен тыс қалумен тең.

Құрастыру, сөзжұмбақ шешу
Ойлау қабілетті арттырып, есте сақтау қабілетті жақсарту үшін құрастырмақ пен сөзжұмбақ шешудің пайдасы орасан зор. Жаңа дүниелермен таныс болып, есептеу кезінде жүйріктігіңіз арта түседі. Мұнымен қоса, әрбір істің шешімін табу кезіндегі төзімділік пен шыдамдылығыңызды шыңдай түседі. Сөзжұмбақ шешу үшін арнайы отырып дайындалатын жер керек емес, тек өзіңізбен алып жүрсеңіз болғаны. Бос уақытыңызды тиімді әрі пайдалы өткізу үшін таптырмас нәрсе.

Шет тілдерін меңгеру
Адам өзінің ана тілінен бөлек өзге елдің тілін меңгерген сайын, дүние танымы өсіп, әлемге басқаша көзқараспен қарай бастайды. Есте сақтау қабілеті артып, жаңа нәрселерге құштарлығы ашылады. Әлемнің қай-қай мемлекетіне де оңай бейімделіп кетуіне себепші болады. Себебі ойлау қабілет жақсы жетілген, өзге тілдерді білетін, есте сақтауы жақсы жандар өз ортасында да, өзге мемлекетте де сыйлы болады.

Видео ойындар
Видео ойындарды түкке тұрғысыз деп айтуға болмайды. Әрбір ойын, әрбір кейіпкер адамның ой өрісінің дамуына, қандай бағыт таңдайтынына себепші факторлардың бірі. Ойын ойнау арқылы адамның жылдам ойлауға, қайткен күнде де жеңіп шығуға деген ұмтылысының дамуына жақсы әсер етеді. Әрине компьютерге отыра салып көзіңізге түскен ойынға тышқанның тетігін басудың қажеті жоқ. Ең алдымен, ойын таңдар кезде ойландыратын, мақсатқа жетуге құштарлықты ашатын, жалықтырмайтын түрін таңдағаныңыз дұрыс. Ойлау қабілетін арттырады деп күнде ойнаудың да қажеті жоқ. Күніне 30 минут немесе бір сағат көңіл аударсаңыз жетеді.

Спорт
Спортсыз бұл дүниені елестетуге болмайтын шығар. Себебі сіздің әрбір қимылыңыз денсаулығыңыздың жақсы болуына көмектеседі. Мамандық талғамайтын бұл хоббимен әрбір адам айналысқаны дұрыс. Әлемнің әр түкпірінен атақты адамдарды іздесеңіз, спортқа әуестігі бар екенін аңғарасыз. Мысалы Сократ  балуан, Пушкин  тамаша гимнаст әрі мерген болған. Спорт күйзелістен арылуға көмектеседі және бұлшық еттеріңізді қатайтып, сырт көзге сымбатты етіп көрсетеді.

B. ZHAQSYMBET