Телефон

Телефонға өте тәуелдімін. Биыл мектеп бітіремін, дайындалуым керек. Бірақ, телефонға бір кірсем, шықпаймын. Не істесем болады?

Әділ, әрине телефонға тәуелділікті жеңу оңай емес. Ерік-жігерің мықты болса, жеңесің деп үмітттенемін. Сайтымызда жазылған мына кеңестерді ұсынамын.

1. Смартфон сізге не үшін керек? Адамдардың көбі смартфонға уақытты аз жұмсаймын деп жоспарлағанымен, оны қалай іске асыру керектігінен бейхабар. Барлығының өз уақыты болады. Смартфонды қолдануды тоқтату үшін, өзіңізге тиімді және тиімсіз тұстарын жазып шығыңыз. Егер мүмкіндігіңіз болса, жағымсыз әдеттерді бірте-бірте жоюға тырысыңыз.

2. Телефонға қанша уақыт жұмсайсыз? Қазір түрлі бағдарлама мен қосымша бар. Солардың бірін ұялы телефоныңызға орнатып алып, қанша уақыт онлайн режимде өмір сүретініңізді біліңіз. Қанша уақытыңыздың текке кетіп жатқанын көрген кезде көңіліңіз қалуы мүмкін. Есесіне, сізге мотивация беретін, сізді алға жетелейтін көмекші болары анық.

3. Бос уақытыңызды неге арнағыңыз келеді? Лифтте немесе кезекте тұрғанда бос уақытыңыз болады. Қолыңызға ұялы телефон алмай, оның орнына ойланыңыз. Кешкі уақытта не істеуге болады? Кітап оқығыңыз келсе, оны көру аймағына қойыңыз. Сол кезде ғана оған назарыңыз ауады.

4. Оффтайм қосымшаларды іске қосыңыз Антивирус секілді, сіздің телефонға тәуелділікпен күресуге мүмкіндік беретін Freedom, OFFTIME немесе Flipd секілді қосымшалар бар. Бұларды іске қоссаңыз, өзге қосымшаларға, веб-сайттарға кіру мүмкін емес.

5. Ұялы телефондағы әлеуметтік желі қосымшаларын өшіріңіз Әлеуметтік желіге тек компьютер көмегімен кіруге тырысыңыз. Әрине, қиынға соғары анық. Дегенмен, сізді смартфонға тәуелді еткен басты дерт – әлеуметтік желі.

Смартфон интернетсіз қызық емес. Бірақ, әлемде интернеттен де қызық дүниелер барын естен шығармаңыз!