“Сұлушаш” поэмасының кейіпкерлері?

“Сұлушаш” поэмасының кейіпкерлері?

Сәбит Мұқанов
С.Мұқанов-қазақ әдебиетінде өзіндік қолтаңбасымен қалған біртуар тұлға. «Сұлушаш» поэмасы- соны көркемдік мұратымен бағаланған туындылардың бірегейі. Шығарма негізіне өмірде болуы мүмкін оқиғалар алынғанымен, қаһармандардың суреттелуінде, күрес жолдарының баяндалуында романтикалық тәсілге тән көріністер ұшырайды. Бірақ «Сұлушаш» поэмасы-трагедиялық шығарма. Поэманың шешімі Қозы мен Баян сұлу, Қыз Жібек пен Төлеген тағдырларын еске түсіреді.
Сәбит Мұқановтың қазақ әдебиетінің алтын қорына қосқан талантты шығармаларының бірі – «Сұлушаш» поэмасы. Оны өлеңмен жазылған роман деп те атайды. Қалай болғанда да осы шығармасы арқылы ақын дәуір шындарын тарихи тақырып тұрғысынан кең қамтып бейнелеуде елеулі табысқа жетті.
Шығарманың сюжеттік желісін ел аузындағы аңыздан алғанымен, ақын оны өз дәуірінің талабымен шебер ұштастырады. Жастардың бостандыққа ұмтылуы арқылы автор жалпы адамзат баласына тән азаттыққа ұмтылу идеясын көрсетеді.
Автор аңыздағы халықтық сарынды сақтайды да, оқиға мазмұнына өз жанынан өзгерістер енгізеді. Сол арқылы өмір шындығын, әлеуметтік мәселелерді терең бейнелейтін реалистік шығарма жасайды. Поэмадағы оқиға бірін-бірі сүйген екі ғашық – Сұлушаш пен Алтайдың махаббатына кұрылған.
Поэманың кейіпкерлері Сұлушаш пен Алтай екі түрлі әлеуметтік ортадан шыққан. Сұлушаш атақты Тілеуберді байдың ерке өскен қызы болса, Алтай – байдың малын бағып жүрген жалшы жігіт. Өмірден көрген қиындығы мен таршылығы Алтайдың намысшыл, жігерлі болып өсуіне ықпал етеді. Оның бойында тағдырдың әділетсіздігіне қарсылық, наразылық ерте оянады.
Алтай Сұлушашқа ғашық болады. Қыз да өнерлі жігітті ұнатады. Бірақ қоғамдағы салт-сана тәртібі екеуінің қосылуына жол бермейді. Өйткені бірі – байдың қызы, бірі – құл мен күңнің баласы.
Армандарына жету жолында жастар көп қиындықтар көреді. Озбырлардан қанша қысым көрсе, олар өз сезімдері жолында бастарын тәуекелге байлайды. Махаббатқа адалдық оларды неге болса да тайсалмай қарсы тұруға жетелейді. Алтай мен Сұлушаштың озбыр топтан қашып шығып, қол ұстасып иесіз тауды паналаған кездерінде, ашығып-тарыққанда оларға осы сезім қуат береді. Алтайдың жанында сенімді серігі Қайсар болады.
Үшеуі тауды паналап, талай қиындыққа кездеседі. Құстың ұясынан жұмыртқа алам деп жартасқа өрмелеген Қайсар құздан кұлап өледі. Алтай мен Сұлушашты оңайлықпен ұстай алмасын білген қуғыншылар таудың етегіндегі қалың орманға өрт қояды. Сондай бір сәтте өрттен қашқан жолбарыспен бетпе-бет келген Сұлушаш жар басынан өзенге секіріп суға кетеді. Жан досы мен сүйген жарының өлімін көрген Алтай өз жүрегіне өзі қанжар салып көз жұмады. екі ғашықтың махаббат жолындағы трагедиясы
Ел ауызындағы аңыз желісіне құрылған поэманың оқиғасы осындай. Адам баласының бас еркіндігін аңсаған жастардың трагедиясы аянышты. Дегенмен бұл трагедияны ақын бірлі-жарым жастардың басындағы күй ретінде суреттемейді. Оны әлеуметтік мәселе дәрежесіне көтереді. Бұл қайғылы оқиғаға себешпі сол кезеңдегі қазақ өміріндегі әлеуметтік теңсіздік екенін баса айтады.
Поэмадағы оқиғалар біріне-бірі жалғасып, ширек дамиды. Кейіпкерлердің іс-әрекеті де үнемі үдеп, бірте-бірте тұлғалана түседі. Оқиғаны баяндауда, кейіпкерлердің образын сомдауда автор фольклорлық бейнелеу құралдарына жүгініп отырады. Мәселен, С.Мұқанов суреттеген Сұлушаштың сұлу бейнесі де, байдың қызы бола тұрып, кедей жігітке ғашық болуы, сол жолда мерт болуы да лиро-эпостық жырлардағы ару қыздарға ұқсайды. Дегенмен Сұлушаштың іс-әрекеті нақты, өз дәуірінің әлеуметтік жағдайларымен үндес, шынайы өмір шындығымен астасып жатыр.
Парасатты, көркіне ақылы сай Сұлушаш ғашығы Алтайдың кедейлігін мін санамайды, онын адамгершілік қасиеттерін қадірлейді. Алтайдың бойында да байлар әулетіне деген ыза мен кек бар. Өйткені көзін ашқаннан бері көргені – байдың есігіндегі жалшылық, жоқшылық, қиянат. Дегенмен шынайы махаббат сезіміне келгенде екі жастың арманы да, мақсаты да үндесіп кетеді. Бірлесе отырып өмірдегі қиянат атаулыға қарсы, адамның бас еркіндігі жолында ақтық, сәттеріне дейін күреседі.
«Сұлушаш» поэмасында автор тек әлеуметтік мәселелерді, екі ғашықтың махаббат жолындағы трагедиялық тағдырын ғана суреттемейді. Поэмада адалдық» ар тазалығы мәселесі бар. Сұлушаш пен Алтай арасындағы ғашықтық арқылы ақын махаббатқа адалдық, ардын тазалығы туралы мәселе көтерсе, Қайсар образы арқылы досқа адалдық, адамгершілік тазалығы жайынан оқырманға ой тастайды. Поэманың композициялық құрылымы шебер, тілі көркем. Бейнелеу құралдары әр алуан. Оқиға барысын, кейіпкерлерінің іс-әрекетін баяндағанда, ауыл тіршілігін, жылқышылар өмірін, табиғат көріністерін сипаттағанда, ақын қарапайым бояумен әдемі өрнек салады. Поэма кейіпкерлерінің ішкі толғаныстарын, сезім күйлерін әсерлі бейнелейді.
Сұлушаш пен Алтайдың махаббат оқиғасы баяндалатын бұл поэмада ақын халықтық аңызды пайдаланған. Сұлушаш-байдың қызы, Алтай- сол байдың есігіндегі құлдан туған ұл. Тетелесе бірге өсіп, бала көңілмен бірін-бірі ұнатып, есейе келе пәк сезімдері махаббатқа ұласқан Сұлушаш пен Алтайдың қосылуына, екі жарты бір бүтін болуына мүмкіндік болмады. Ғашықтар махаббатының діңгегі, менің ойымша, екеуі де болып тұр. Дегенмен ,бұл жерде Сұлушаштың махаббатқа адалдығына тоқталып өтпесек болмайды. Байдың ерке, сұлу , ешқандай қиындық көрмей өскен қызының ел-жұрттың әңгімесінен, болашақ өмірдің қиындығынан қорықпай, тыныш әрі жайлы өмір үшін махаббатын тұншықтырып кетпегені ерлікпен пара-пар деп айтсам қателеспегенім болар. Махаббат жолында ол өзінің жақсы өмірін құрбан етті, көп секілді қорқау болып қалған жоқ. Алтайдың жанынан басқа жоғалтар ештеңесі болған жоқ, соның өзінде оның бай күшінен қорықпай, ұзатылып кеткен Сұлушашты алып қашуы да көзсіз ерлік болатын. Екі жастың да махаббатқа адал болғаны соншалық, оларға ешқандай күш тосқауыл бола алмады, сол себептен де олардың махаббаттарының діңгегі берік әрі мықты болды. Әлеуметтік теңсіздіктеріне қарамай бір-бірін ұнатып, махаббаттарына берік болған екі жастың бақыты баянды болмай, соңында қашып жүріп, екеуі де мерт болғаны сондай өкінішті. Барлығы да заманның , сол заманның ғана емес, мүмкін, екеуіне елге келіп, тыныш өмір сүруіне мүмкіндік бермеген қоғамның кінәсі. Екі жастың жолында құрбан болған Алтайдың інісі мен досы Қайсардың да Сұлушаш пен Алтайға деген жанашырлық ниеті, достық пейілі поэмада көрініс табады. Қазақ әдебиетіндегі ғашықтар тақырыбын толықтырып, көркін келтіріп тұрған көлемді шығарма, поэмалардың бірі- Сәбит Мұқановтың «Сұлушашы». Алтай мен Сұлушаштың махаббатының діңгегі- екеуі де. Бірге болу үшін жолында тұрған қиындықтың бәрін еңсерді, дегенмен, сәттілік серік бола қоймады, соңы екі жастың да ажал құшуымен аяқталды.

Толығырақ: https://massaget.kz/blogs/omirdin_ozi/22213/
Материалды көшіріп басқанда Massaget.kz сайтына гиперсілтеме міндетті түрде қойылуы тиіс. Авторлық құқықты сақтаңыз
(С.Мұқановтың «Сұлушаш» романы желісінде) «Өмірде болған оқиғаның бәрі кітапқа кіруге сұранып тұрады» деген екен француз ақыны Малларме. Өзі көрген, сезінген, жүрегінің түбінен терең орын алған нәрселерінің бәрін маржандай етіп тізіп кітабына енгізген дүниеде екі жазушы болса, оның бірі - Сәбит Мұқанов. Сәбит Мұқанов халықтың сүйікті жазушысы болды. Қазақтың ауыз әдебиеті үлгілерін зерттеп, әдебиет тарихы, ұлы тұлғалар өмірі туралы зерттеу еңбектерін жазды. Ғабит Мүсіреповтың тілімен айтсақ «Жазушы Сәбит Мұқановтың қаламынан туған еңбектер өз алдына бір энциклопедия». Ендігі әңгіме, осындай өмірдегі бар кейіпкерді шығарманың басты арқауы етіп алған «Сұлушаш» жөнінде болмақ. Т.Нұртазин шығарма туралы былай баға берген еді: «С.Мұқановтың «Сұлушаш» атты роман-поэмасы жеке кітап болып шықты... Қазақ тілінде осы күнге дейін көлемді әлеуметтік роман жоқ». С.Мұқановтың «Сұлушаш» романы жөнінде көп арасында поэма деген ұғым қалыптасқан. Өлеңмен жазылғандықтан, «поэма» деп атайды, бірақ ол жаңсақ пікір. Оны дәлелдеу үшін жазушының Майра Жансееваға жолдаған хатында «Сұлушаш» - өлеңмен жазылған роман деп жазылсын» деп атап көрсетіпті. Кейінгі зерттеу жұмыстарында да жазушының осы пікірі тарамдатыла баяндалып жүр. Сәбит Мұқановтың 26 жасында қазақ әдебиетіне қосқан өлшеусіз еңбегі – өлеңмен жазылған «Сұлушаш» романын дүниеге әкелуі еді. «Жиырманың ішінде ұлт әдебиетінде құбылысқа пара-пар шығарма жазу әдебиет тарихында сирек кездеседі. Бұл ретте жастық пен кемелдікті ұштастырған жазушы санатында әлемдік әдебиет тарихында Шолохов пен Томас Маннды ғана айта аламыз,» - деп Қ.Ергөбек «Сұлушаштай» романды тудырған автор еңбегін жоғары бағалаған. «Сұлушаш» романы ел аузында ғасырлар бойы сақталып, халық арасында кең таралып келген аңыз негізінде жазылған. Социалистік реализм әдісі совет суретшісінен өткен күннің тақырыбын бүгінгі заманның биік тұрғысынан қарап шешуді, оған өзінің белсенді қатынасын білдіруді тілейді. С.Мұқанов та өзінің романында осы принципті басшылыққа алады. Әр ғылымның белгілі бір кезеңі жасаған жаңалығымен есте қалады. Әдебиет тарихында да өзгеше бір серпін мен жаңалық әкелген Сәбит шығармалары, соның ішінде «Сұлушаш» еді. Себебі қазақ әдебиетінде өлеңмен жазылған тұңғыш роман және атақты поэмалардың қатарынан орын алған «Күй», «Күйші», «Көкшетаудан» бұрын жазылып, өз бағасын алған туынды. «Сұлушашқа» екі жылдық өмірім кетті. Бұны 1926 жылдың күзінде бастап едім» - дейді С.Мұқанов. Иә, шынында жазушының айтқанындай 2 жыл уақыт кетіп, шығарма 1928 жылы басылып шыққан болатын. Шығарма халықтық «Сұлушаш» эпосының негізінде жазылған. Себебі Сәбит Мұқанов кішкентайынан халық эпостарын жаттап өскен. Бұлай деп айтатын болсақ, негізгі кейіпкер Сұлушаштың прототипі Мариям екенін дәлелдеу қиынға соғады. Бірақ С.Мұқанов эпос желісіне сүйене отырып, кейіпкерлерді өзі араласып жүрген ортадан алып суреттеп, бейнелейді. Сұлушаштың романдағы бейнеленуінде Мариямның кескін-келбеті барлығына көз жеткіземіз. Оған дәлел: Он алтыға келгенде кемел жасы, Салбырап тізесіне түсті шашы - дейді. Ал, Мариям Мұқанованың «Менің Сәбитім», «Сағынышым Сәбитім» естеліктерінде Мариям апай былай дейді:"Мен он алты жасымда Сәбитке тұрмысқа шықтым. Сәбит екеуміз 47 жыл бірге өмір сүрдік... Сәбиттің жиі айтар сөзі "шашыңнан айналайын Мәриям" болушы еді. Расында да шашым ұзын болатын. Екі шешем (туған анам мен әжем) шашымды қымызбен жуып мәпелейтінін білетін Сәбит: "Бір үйдің еркетотайы едің, қайдан білейін күте алып жүрсің бе, жоқ па шашыңды" - дейді. Бақсам мені жассынады, жайы болмай жүр ме деп ойлайды екен ғой. ...Содан бір күні Мәриям деп шақырып алып, түюлі шашымды тарқаттырды. Өргізді. Жаңа көргендей үңіліп, әр қырынан қарайды. Жас кезім, қатты қысыламын. Бірақ ештеңе демеймін» - дейді. Сол кезде Мариям апайдың шашына қарап отырып Сұлушаш бейнесін суреттеген екен. Бір сәт «Сұлушаш» сөзінің этимологиясына көз жүгіртсек, «сұлу» және «шаш» деген екі сөздің бірігуінен жасалған. Ал сол сұлу шаштың иесі кім? Әрине, Мариям апай. Мариям апайдың «Сұлушаш келін» атануы да тегіннен тегін емес болар. Сәбең шығарманы жазып болғаннан кейін үйіне келген Сәкен бастаған топқа осы туындыны оқып береді. Міне содан кейін Мариям апай «Сұлушаш»» атанады. Сәбиттің көптеген кесек туындылары бар. Неге солардың бірінің басты кейіпкерінің есімі Мариям апайға телінбей, Сұлушаш есімі ғана берілді? Ойланатын дүние. Себебі «Сұлушашта» Сұлушашты суреттегендегі Сәбиттің жан қиналысы, жарының шашына қарап отырып шынайы болмысты бере білуі оқырманды баурап алады. Күн-күн санап толқыды туған айдай, Қап-қара көз, қыр мұрын, қасқа маңдай. Қаз мойынды, кең иық, сұлу тұлға, Тіп-тік тауда өскен қарағайдай. Кір қожалақ табанын тас тілсе де, Жүдемеді, үдеді гүлдей жайнай – деп шығармада берілген суреттеу өмірдегі Мариям апайға қатты ұқсайды, себебі Сәбит екеуі қанша қиыншылық көріп, барар жері болмаса да мойымайды. Мариям апайда тән сұлулығы мен жан сұлулығы астасып кеткен. Сонымен қатар шығарма мазмұнында Сұлушаш байдың қызы болса да, кедейден шыққан Алтайға ғашық болады. Оның кедейлігін мін санамай, адамгершілік қасиетіне бас иеді. Мұның өзі Сәбит Мұқановтың өз өміріне тым қатты ұқсайды. Сәбит те сіңірі шыққан кедей отбасынан шығып, өзінің еңбекқорлығының, бейнетқорлығының арқасында жанкештілікпен, азулымен алыса жүріп биіктерден көрініп, тарихта аты қалған Сәбитке айналды. Апайдың қолаң шашына қатысты өзінің «Менің Сәбитім» атты естелігінде былай дейді: «Әлі есімде, 1942 жылы, күзде Мәскеуден келген жазушылардың бәрін үйімізде қонақ еттік. Қой сойып, А.Толстойдың алдына қазақ рәсімімен бас тарттық. Әйелі Наталья Ильиничнамен екеуі таңданумен болды. Менің ұзын екі бұрым шашыма қайта-қайта қарап, «жасанды емес пе» деп сұрады. Қасына отырғызып, бұрымымды қолымен ұстап, таңданысын жасыра алмады. Сол жолы ескерткішке деп суретке түскен едік, кейін жоғалтып алдым». Бұл да болса Мәриям апайдың шашына таң қалған адамдардың бірі ғана. Сәбит Мұқанов сөз арасында айтып отырады екен «Сұлушашты» сенің алтын шашыңа арнадым» деп. С.Мұқанов өмірінің соңғы жылдары Жезқазған облысында болып, Сарыкеңгір, Қаракеңгір атты қос өзен арнасын аралап, белгілі-белгісіз көп тарихи ескерткіш-зираттармен егжей-тегжейлі танысады. Бұрында да болған екен. Енді әлдене іздеген сыңайы бар. Ақыры іздегенін тауыпты. Сол өңірдегі ескіден жеткен ескерткіштің біріне «мынау Сұлушаштың белгісі, мазары» - деп таңба салыпты. Тосын оқиғаға төңірегіндегілер түсінбейді, әрине. Жазушы «солай болсын халайық енді» депті. Үні жалынышты еді дейді. Көзінде жас тұрды дейді. Міне, өз кейіпкерін соншалықты қатты жақсы көру. Мұнан білеріміз, «Сұлушаш» - жазушының жүрегіне тым жақын, қатты жақсы көрген туындысы. Кей естеліктерде С.Мұқанов үлкейген шағында да бала кезінде өзі жырлаған «Сұлушаш» дастанын домбыраға қосып айтып отырады екен. Ресми идеология «Сұлушаш» туралы қаншама қатты пікір айтып, қоғамдық сананы қақпайласа да, романды халық жақсы қабылдады. Халықтық эстетика болашағының зор екендігін көрсетті. Шынында да, халықтың сүйіп оқитын шығармасына айналды. Тіпті жастар жаттап алып та айтып жүрген кездері болған. Қорыта келсек, С.Мұқановтың «Сұлушаш» романы эпос желісінде жазылған шығарма болғанымен, бүгінгінің шындығын қамти, өзгерістерге ұшырай жазылған. С.Мұқановтың өзі бұл туралы былай дейді: «Мен маңғаз Алтайды құлдың баласы, өмірі кісі есігінде мехнат көрген батрақ еттім. Құлдың баласына ғашық Сұлушаш Сүйіктісімен елге сыймай, тағы тауға барып паналаған болып шықты. Қайсар, Ермектерді жанымнан қостым да, сюжет құрдым». Сонымен қатар, романды С.Қирабаев «Сұлушаш» махаббат тақырыбына жазылған шығарма емес, үлкен саяси әлеуметтік туынды» деп жоғарыда айтылған Т.Нұртазиннің пікірін қостайды. «...аз ба, көп пе Сұлушаш бейнесін жасауда жазушы өз жарының портретін пайдаланған» - деп Құлбек Ергөбек айтқандай, романмен қатар Мариям апайдың жан жары Сәбеңе арнап жазған естелік кітабын, «Өмір мектебі» трилогиясын оқыған көзі қарықты оқырман бірден байқайды: мінездің берілуі, сыртқы бейнелерінің сипатталуы бірдей деуге болады. Ұқсастық табады. Сәбиттің идеологиялық көзқарасына қаншама сыни пікірлер айтылса да, шығармалары төмендеген жоқ, қайта биік тұғырдан көрінеді. Халықтан асқан ұстаз жоқ. Не нәрсенің де бағасын беретін халық болғандықтан, Сәбит Мұқанов халық арасында әлі беделді. Оған Мұхтар Әуезовтің мына сөзі куә: “Қазақ әдебиетінің аға жазушысы Сәбиттің аты – қазақ оқушысының мол қауымына өте даңқты, анық қымбат аттың бірі”. Арнайы Массагет.кз үшін: Ақжүніс Оспанқызы

Толығырақ: https://massaget.kz/layfstayl/debiet/kkzhiek/4635
Материалды көшіріп басқанда Massaget.kz сайтына гиперсілтеме міндетті түрде қойылуы тиіс. Авторлық құқықты сақтаңыз