Кітап - үнсіз мұғалім
жеке
блог

Кітап - үнсіз мұғалім

    Кітап адам өмірінде үлкен және маңызды рөл атқарады. Кітап – бұл, ең алдымен көркем әдебиет болсын немесе ғылыми-көпшілік әдебиеттер болсын, баға жетпес білімнің қайнар көзі. Ақпарат – адамдардың эволюциялық дамуы мен ғылымның ілгеріленуіне байланысты әр алуан түрде кездесетін құнды дүние. Соның ішінде ақпарттың таптырмас қайнар көзі ретінде кітапты алуға болады.

    Кітап – үнсіз мұғалім. Ондағы ақпараттарды жандандыру үшін тек қана қызығушылық пен оқуға деген ниеттің болуы талап етіледі.

    Кітап – әр алуан ақпарат түрлері сан ғасырлық тарихы және қыр-сыры ұштастырылған түрде кездеседі. Яғни, адамның ана сүтінен дарыған ана тілін жетілдіруші  ең алғашқы ақпарат әліпбиден бастау алып, ата-бабаларымыздың қалдырған өсиеттері, тарихи деректер мен әдеби жанрлардағы туындылар, соның ішінде өлең-жырлар, қызықты да танымды жазбалар, энциклопедиялар, тіпті заманауи жанрлардағы жазбаларға дейін дәл осы кітаптардан табылары анық. Сол себепті кітап – ақпараттың, ақпарат алмасудың атасы және ең сапалы қайнар көзі.

    Кітап оқу адамға жағымды әсер етеді. Олар адамның ойлау, пайымдауда санасын кеңейтеді, дүниені тануға деген құлшынысын арттырады, сөздік қорын толтырады, құндылықтарын, тіпті мінезін өзгертеді. Психологиялық тұрғыда алып қарасақ, кітап  қиын өмірлік жағдайдан шығуда таптырмас құрал. Кітап оқитын адамдармен қарым-қатынас жасау әрқашан қызықты және олар көптеген түрлі тақырыптарды қолдай алады. Кітап оқу кез-келген жастағы адамдар үшін керемет уақыт өткізумен тең.

   Қазіргі таңда ғылым мен заманауи дамудың талаптарына сай  кітаптар аз көлемде, бірақ, жаңаша электронды форматта шығарылуда. Әрине, жаңа форматтағы электронды кітаптардың кітапты пайдаланушыға, оқырманға деген тигізер пайдасының екі қыры бар. Біріншіден, электронды оқулықтар экономикалық тұрғыда оңай қолжетімді болса, екіншіден, электронды кітаптардың болуы олардың бастапқы құндылығын жоғалтуына септігін тигізіп келе жатқандығы анық. Яғни, электронды нұсқадағы кітаптарды пайдалану шын мәнісінде, кітапты пайдалану этикасын жоғалтуда және кітап авторының авторлық құқығына кері әсерін тигізеді. Сондай-ақ, кітап оқырмандарының жас ерекшелігінің әртүрлі болу мүмкіндігін ескерсек, электронды оқулықтарды пайдалану орта және қарт буындағы адамдар үшін бірқатар қолайсыздықтар туындатады, ал өскелең ұрпақ тәрбиесі мен білім алуына қажетті қазақ тіліндегі баспа өнімдерінің жеткіліксіздігі де бар. Осы орайда, баспа ісін дамыту мен ондағы мамандар біліктілігін арттырудың қажеттілігі туындайды.

   Аталған мәселелерді шешудегі бірден-бір үлесіміз ретінде біз кітапқа деген қызығушылығымызды арқау ете отырып, болашақ баспагер-редактор маманы болу үшін Әл-Фараби атындағы Қазақ Ұлттық университетінің «журналистика» факультеті, «баспа ісі» мамандығы бойынша білім алып жатқанымызды айтуға болады. Білім алу жолында біз теориялық және тәжірибелік дағдыларды нығайту мақсатында, университетіміздің қалашығында студенттер үшін ерекше аймақ – кітап қоры 2 миллионды құрайтын «Әл-Фараби» кітапханасында ақпараттар жинақтаймыз. Бұл кітапханада білім алушылар үшін мерзімді басылымдар залынан күнделікті жарияланатын ақпаратпен, 250-ге жуық республикалық және халықаралық газет-журналдармен [1] танысу мүмкіндігі қарастырылған.

   Қорытындылай келе, кітаптың мағыналық құндылығы мен қоғамды ақпараттандырудағы рөлі ондағы келтірілген ақпараттардың, көрнекілік үшін ұсынылған материалдардың өзекті және кітап атауымен сәйкес болуы, авторлар ойының толықтай ашылуы, грамматикалық тұрғыда қатесіз әрі көркем нақышта жазылуы, ойға жағымды да түсінікті болуы, ақпараттың шынайы, оқырманға пайдалы болуымен сипатталады. Бұл жағдайда баспагер-редактор маманының кәсібилік дағдысының атқаратын рөлі зор. Айта кетерлік жайт, дәл осы редактор маманының дағдыларды игеруі мен қажетті ақпараттарды жинақтауы үшін де кітаптар қажет. Яғни, кез келген ұлы істердің бастауы игі құрал – кітап.   

Пайдаланған әдебиеттер тізімі:

1.Әл-Фараби кітапханасы [Электронды ресурс]. https://bkmisd.kaznu.kz/?page_id=124&lang=kz / (қаралған күні: 08.11,2021 ж.)

 

Авторлары:

Әл-Фараби атындағы ҚазҰУ, журналистика факультеті, баспа ісі мамандығы студенттері

Ғазиз Ұлпан Архатқызы, Әсемқараева Меруерт Алтынбайқызы