"ҚЫЗЫЛ САЙТАНДАР" ТАҒЫ ДА ЖҮЛДЕСІЗ ҚАЛДЫ
жеке
блог

"ҚЫЗЫЛ САЙТАНДАР" ТАҒЫ ДА ЖҮЛДЕСІЗ ҚАЛДЫ

Бельгия ешқашан Еуропа чемпионатында Италияны ұтқан емес. Бір рет қана (1980 жылы) тең ойнаған, екі рет ұтылған. Бір ұтса осы жолы ұтуы керек еді. Өйткені "қызыл сайтандардың" қазіргі буыны өте мықты футболшылардан құралған, соңғы жылдары кез келген турнирге фаворит ретінде барып жүр. Алайда бұл жолы да Италия айласын асырып кетті. Айласын асыратындай бар, Италияның бапкері Роберто Манчини өте тәжірибелі маман, футболшы ретінде де ірі турнирлердің талайында бақ сынаған. Демек мұндай додаларда қалай әркекет жасау керектігін оған ешкім үйрете алмайды. Бельгияның алтын құрамы тағы да жүлдесіз қалды. Келесі ірі турнирге дейін мына футболшылар осы қуатын сақтап қала ала ма, жоқ па, бірдеңе деу қиын.

Енді Италия жартылай финалда Испаниямен кездеседі. Бір қызығы, Испания мен Италия соңғы төрт Еуропа чемпионатында (2008, 2012, 2016, 2021) бесінші рет кездескелі жатыр. Аталған чемпионаттарға дейін де екі рет өзара ойнағанын ескерсек, келесі кездесу — бұлардың Еуропа чемпионаттарындағы жетінші рет тоқайласуы. Бұл да бір рекордтық көрсеткіш.

Испания ширек финалда Швейцариядан анағұрлым басым ойнағанымен (допқа иелік ету, соққылар саны секілді компоненттерді есептегенде), матч пенальтилер сериясына дейін жалғасты. Әлде де швейцариялықтар бір ойыншысы қуылмағанда, жартылай финалдың да төбесін көріп қалар ма еді... Бірақ француздармен ойындағыдай емес, бұл жолы швейцариялықтардың жолы болмады, пенальтилер сериясында бір рет қана дәл нысананы көздеді. Соған қарамастан турнирден көтеріңкі көңіл-күймен қайтуларына негіз бар. Чемпионаттағы ең қызықты, ойыны тартымды құрамалардың бірі бола алды. Ширек финал да аса төмен көрсеткіш емес.

Бүгін Англия – Украина, Дания – Чехия құрамалары кездеседі. 1/8 финалға да, ширек финалға да ең соңғы боп жолдама алған украиндар бүгін қалай ойнар екен… Бұл екі құрама 2012 жылы да кездескен. Сонда Англия 1:0 есебімен басым түскен. Сол ойында Украинаның таза голы есептелмей қалып, УЕФА тәртіптік кеңсесінде кәдімгідей шу болғаны есімізде. Бүгін не боларын санаулы сағаттардан соң білеміз.