Балғынбекке арналған кеш!
жеке
блог

Балғынбекке арналған кеш!

Адамзат баласының бойындағы асыл қасиеттің бірі – қайырымдылық. Себебі, қайырымдылық кез келген жақсылық пен игіліктің нышаны болып табылады. Ал жақсылық пен игілікті іс жасау – үлкен адамгершіліктің белгісі. Адам адамға жақсылық жасау үшін жаралғанын жүрегімен сезінетін көптеген абзал жандардың басқа адамдарға қайырылысып жүргенін көзімізбен көріп, құлағымызбен естіп жүрміз. Қайырымды жандардың игі істері өзгелерге үлгі болатыны айтпасақ та түсінікті нәрсе.  

Қайырымды істің қайыры бар.

Ақтауда «Бекен» жас көшбасшылар достастығының «Жүрекке жылу» жобасы аясында «Жақсылық жаса» атты қайырымдылық концерт өтті. «Қазақстан – Ақтау» телеарнасындағы «Үміт сәулесі» бағдарламасынан осыдан 2 ай бұрын Балғынбек есімді бүлдіршінге протез салдыру керектігі жайында айтылған еді. «Бекен» жас көшбасшылар достастығы бүлдіршіннің тағдырына бей – жай қарай алмай, баланың отбасына көмек қолын созуды мақсат етті. 

Екі қолынан айырылған Балғынбектің еміне арналған қайырымдылық шараға 200 – ге жуық өнерпаз атсалысты. Шараның бас ұйымдастырушысы, «Бекен» жас көшбасшылар достастығының директоры Мұқаш Бекенұлы: 
- Біздің мақсатымыз - жастайынан тағдыр тауқыметін көрген 11 жасар Балғынбек Бақтиярға қаржылық қолдау көрсету болды. Бүгінгі кештен жиналған қаражат Балғынбекке тапсырылды. Бұндай игі шара «Жүрекке жылу жобасы аясында жыл бойы жалғасын таппақ. Бүгінгі шараға қолдау көрсеткен барша жандарға алғысымыз шексіз»

Аталған шараны ұйымдастыруда Қазақстанның белгілі азаматтары, Маңғыстаудың өнер жұлдыздары өз қолдауларын білдірді.

Қайырымдылыққа үлес қос!
Билет құны: бар-жоғы бес жүз теңге,
Досыңмен кел, бұл кешке доссыз келме.
Сауапты айда сауаптан айырылып,
Болмайық ғапыл қалған ессіз пенде! - деп, атақты айтыскер ақын Балғынбек Имаш ұйымдастырушыларға өз қолдауын Instagram желісі арқылы жеткізді.

«Бекен» жас көшбасшылар достастығы өз кезегінде барша мейірімді жандарға, соның ішінде «Forte bank» АҚ МОФ ұжымына, «Qazaq design», «Free Art Media» фото – видео студиясына алғыс білдіреді.