Қазақтың азаттығы мәңгі дастан

Қазақтың азаттығы мәңгі дастан
жеке
блог

Қазақтың азаттығы мәңгі дастан

Құдайдың құдіреті жаратқан жер,
Көк майса періштеге жалатқан жер.
Арылып сала берді пәк күйінен,
Тарыдай тар әлемге таратқанда ел.

Бөлісті бастарына, бөлшектеді,
Жұлымдап жыртылуда жер шекпені.
Бәріде еркіндікке таласуда,
Баласын тастай салып емшектегі.

Ауысып қанша ғасыр өткенімен,
Таластың өте алмай жүр өткелінен.
Қара жер кіндігіне бабам келді,
Көк байрақ, көк тәңірі –көк бөрімен.

Мыңдықтың мысын басып үркітіпті,
Жонын да көрсетпепті түлкі тіпті.
Қазығын қазақтықтың, азаттықтың,
Ту етіп бал-бал тасқа түркі тікті.

Төгіліп уақыт дейтін уыс құмда,
Жатып жеп жатырыңды жымысқыңда.
Ішіне құрт боп біткен сатқындықтан,
Бір тыныш жата алмпаты қылыш қында.

Ботадай боздап жатыр дала біткен,
Қара жер боздау үшін жаралып па ең?!
Құдайдан басқасына бас имеген,
Бабамның басын буды бұғалықпен.

Ананың қан боп көзде жасы кепкен,
Ханның да, хас батырдың басы кеткен.
Шекесін қара жерге бір тигзібей,
Бабамның домалаған басы неткен!

Топырақ қан ішпеген бұлай қанып,
Көрінде жатқан жандар шулайды анық.
Көруге төсіндегін шыдамаған,
Көк аспан жерге түсті шыр айналып.

Көкке алып ханыменен, батырын да,
Тыншыды сары дала ақырында.
Азаттың алмасынан тамған қандар,
Жетілді Жер-ананың жатырында.

Сүйретіп қан қылышын қыс та келді,
Жер-Ана толғатсын деп қыстап елді.
Кетпек қой ұлын құлғып еркіндіктің,
Мұзына отырғызып қыпша белді.

Анамыз жан берісіп төзді бекем,
Ессіздер кеудесінен езді ме екен...
Мына қыс мың ғасырдың қанын жұтқан,
Қайратты ала алмасын сезді ме екен?!

Қайтадан бозінгендей боздап жерім,
Баяғы шерін қайта қозғады өлім.
Тарихтың тақтасына тас боп қалған,
Тарихын мәңгі қанмен жазбақ елім.

Желтоқсан әкелгенде қысы мұңды,
Азатқа аққан қанның күші сіңді.
Анасын еркіндіктің қорлғап жатқан,
Сары шұнақ аяздың тісі сынды.

Гүлдеді гүлі қайта көп қабірдің,
Жібіді кепкен қаны көк тамырдың.
Жау біткен жер жастанды өйткені олар,
Ұмытты бар екенін Көк тәңірдің.

Көк бесті мініп сені өңгерем мен,
Жүзіңе тамып көктен оң берем мен.
Қазақтың азаттығы мәңгі дастан,
Дүние есіңде тұт дөңгеленген!

16.12.2014ж