Көктемді неге күтеміз?
жеке
блог

Көктемді неге күтеміз?

Қыстың ауыр күндері еңсемізді біраз басып тастағандай ма қалай? Әлде маған солай аяқталды-ау шамасы. Қыс болса да, аппақ қарымен даланы орап жатқаны ғажап қой. Алайда бұл көрініс қала ішінде, маңында көп тұрақтамайтыны анық. Сондай сәтте ауылға тартып кеткім келіп тұрады. Жалпы әр мезгілдің өзіндік ерекшелігі бар. Көктем келіп, қалың киімді тастағанның өзі мен үшін бір қуаныш екен (сіз үшін қалай екенін білмедім). Көктемді күтпейтін тіршілік иесі жоқ та шығар (аюлар болмаса). Түннен кейін күннің келетіні сияқты қыс қылышын сүйретіп өтіп кеткенше көктемді күтіп жүреміз. Өйткені көктемнен жақсылық, махаббат, жаңа серпін күтеміз.  Табиғаттың осы бір оянған мезгілі адамның жүрек түкпіріндегі ізгі сезімдерді де оятатындай.

Кішкентай кезімде көктемді асыға күтетінмін. Оның себебі де жоқ емес. Дәл 8 наурыздан кейін ауылда саңырауқұлақ теру маусымы басталатын (әр өлкеде әр қалай шығады ғой). Жаңбыр жауған түннің таңында кім ерте тұрса, соның «қанжығасы майланып қайтатын». Кейде кішкене саңырауқұлақтарды көріп, кесіп алуға қимай, шөппен жасырып та кететінмін. Екі-үш күннен кейін қайта барғанымда көбіне орнында жоқ болып шығатын. Ауылда мен секілді саңырауқұлақ тергіш тапқыштардың талайы бар еді. Қазіргі дүкендерде тұрған саңырауқұлақтарды сол кезде "жыланбас" деп талай рет теуіп кеткенмін. Ауылда оларды термейтін, және улы саналатын. Оқта-текте орыстардың теріп жүретінін байқайтынмын. Ия, жаза берсең, «саңырауқұлақ хикаясы» таусылмайтындай. Еліміз тәуелсіздік алғаннан кейінгі тұралап тұрған бір жылдары бір ауылды осы бір кәсіп те асыраған еді... Жә, тақырыптан ауытқымайын...

Қазіргі күтіп жүрген көктемім басқа? Ол көктем оралмайдыға айналған. Бәлкім сіздің де күтіп жүрген көктеміңіз басқа шығар? Бөлісе отырыңыз. Көктемнен не күтесіз, неге күтесіз? Немесе көктемге қандай арман-мақсаттар қойып отырсыз? Араларыңызда «осыдан көктем шықса...» деп жүргендеріңіз де бар шығар. Жоқ емес, бар екені айқын. Сол «осыдан көктем шықса...» деген ойдағы дүниелеріңіз орындала берсін. Көктем сіздерге қуанышын сыйласын. Ал мен көктемнен жазды күтемін)))