Бүгін бірнеше өңірде үсік жүреді

Бүгін бірнеше өңірде үсік жүреді

Қазгидромет 20 қыркүйекке арналған ауа райы болжамын ұсынды, - деп хабарлайды Massaget.kz тілшісі.

Бүгін Қазақстан аумағының басым бөлігі әлі де ауқымды антициклон ықпалында болады. Осыған байланысты жауын-шашынсыз ауа райы сақталады. Атмосфералық фронталды бөліктердің өтуімен еліміздің батысында, оңтүстік-шығыстың таулы аудандарында найзағай ойнап, жаңбыр жауады. Жекелеген өңірлерде жел күшейіп, оңтүстікте, оңтүстік-батыста шаңды дауыл тұрады.

Сейсенбі күні Қызылорда, Түркістан, Жамбыл облыстарының басым бөлігінде, Қарағанды облысының оңтүстігінде, Ұлытау, Ақтөбе облыстарының шығысында, Алматы облысының солтүстігінде және орталығында, Абай облысының солтүстік-батысында, солтүстігінде, шығысында, Атырау облысының солтүстігінде төтенше өрт қаупі сақталады.

Қостанай облысының оңтүстігінде, Павлодар облысының орталығында жоғары өрт қаупі сақталады.

Түнде Ақмола облысының шығысы мен орталығында, Қарағанды облысының солтүстігінде және шығысында, Шығыс Қазақстан облысының солтүстік-шығысында, Абай облысының батысында 1-3 градус үсік сақталады.

Жаңалықтарды бәрінен бұрын біліп отырғыңыз келсе, Telegram-арнамызға жазылыңыз!

Г. Досымшалова