Ағасы інісінің орнына ҰБТ тапсырмақ болған - ҰТО

Ұлттық тестілеу орталығы ағасы інісінің орнына ҰБТ тапсырмақ болғанын мәлімдеді, - деп хабарлайды Мassaget.kz.

"Биылғы ҰБТ "Бір тестілеуші-бір компьютер-екі камера" принципі бойынша өтті. Бір камера талапкердің тест тапсыру барысын қадағаласа, екінші камера сол адамның өзі отырған-отырмағанын белгіленген уақыттың ішінде суретке түсіріп, тіркейді. Тестілеудің басынан аяғына дейін басқа адам емес, тест тапсырушының өзі отырғанын бақылайды. 

Біз тест тапсыру барысында тест тапсырушының орнына басқа адам кірген бірнеше оқиғаны анықтадық. Солардың бірі - ағасы інісінің орнына ҰБТ тапсыруға тырысқан. Бірақ биометрика, кіреберістегі бет-әлпетті тану арқасында бұған жол берілмеді. Тиісті шаралар қабылданды", - деді Орталық коммуникациялар қызметінде өткен брифингте Ұлттық тестілеу орталығының директоры Руслан Емелбаев.

Сонымен қатар, тестілеу орталығының директоры жалпы ҰБТ кезінде тыйым салынған заттарды алып жүру әрекеттері және ереже бұзу деректері азайғанын атап өтті.

"2021 жылы ҰБТ-ға тыйым салынған заттарды әкелуге 756 әрекет жасалса, биыл мұндай 327 оқиға тіркелді. Бұл көрсеткіш 2022 жылы мұндай қатысушыларды тестілеуге жібермеу туралы ереженің енгізілуіне байланысты азайды.

Мысалы, 2019 жылы кіреберістен 128 000 тыйым салынған зат табылды. Биыл 2019 жылмен салыстырғанда парақ пен смартфон алып жүруді қалайтындар саны азайды", - деді ол.

Тестілеу кезінде ережені бұзғаны үшін 322 талапкер аудиториядан шығарылды, олардың нәтижелері жойылды.

"Өткен жылы тестілеу барысында 1305 адам аудиториядан шығарылды. Сонымен қатар, біз 2022 жылдың 31 желтоқсанына дейін барлық бейнематериалдарды талдаймыз. ҰБТ кезінде тыйым салынған заттарды пайдалану немесе ережені бұзу деректері анықталса, нәтижелер білім беру грантын тағайындау туралы шешім жойылғанға дейін шығады. Мысалы, норма алғаш рет 2020 жылы енгізілді, содан кейін бейнежазбаны көргеннен кейін 152 үміткердің нәтижесі жойылды, 2021 жылы - 52", - деп қосты Руслан Емелбаев.

ҰБТ қорытындысы бойынша қазіргі таңда 15 қатысушының нәтижесі жойылды, 200-ден астам тест тапсырушының нәтижесі тексеріліп жатыр.