«Сэйлор Мун» (Sailor Moon) анимесі

Кеңес дәуірі ыдыраған тұста туылған балақайлардың барлығы дерлік Жапонияның «Сэйлор Мун» (Sailor Moon) анимациялық туындысын көріп өсті. «Сэйлор Мун» (Sailor Moon) анимесі Жапонияда «ең әдемі аниме» атағын иеленген.

«Сэйлор Мун» (Sailor Moon) 1992 жылы көрсетіле бастаған сәттен-ақ көрермендердің ықыласына бөленіп, бес жыл бойы арналардан түскен жоқ. Бұл медиа-франчайз Жапонияда ғана емес, сондай-ақ, Австралия, Франция, Бразилия, Италия, Испания, ТМД елдерінде көрсетіліп, үлкен танымалдылыққа ие болған.

Аниме кейіпкерлерінің дизайнын Икуто Ито, Кадзуко Тадано және Кацуми Тамэгаи жасаған. Суретші-дизайнерлер кейіпкерлердің әсем келбетімен қатар, сиқыр мен ғажайып іс-әрекеттерді шынайы көрсете білді.

Аниме кейіпкерлері әр түрлі болғанымен, оларды шынайы достық пен алға қойған үлкен мақсаттары біріктірді. Әрқайсысының өзіндік күші бар. Барлығы өз күштерін ортаға салғанда олар кез келген жауға қарсы тұрып, жеңіп  шығады. Жанарларынан сұлу жандары көрінген сэйлор-сарбаздар талай қыздардың сүйікті кейіпкерлеріне айналған.

Банни (Усаги) Цукино – жаны таза, өмірге құштар жасөспірім. Ол қызықты әрі орынсыз жағдайларға жиі түсіп тұрады. Оның кішкентай балаға тән қылығы бар. Алайда, Сэйлор Мун сарбазына айналған сәтте ол аңғал мінезін артқа тастап, әділдік пен мейірімділік үшін күреседі.

Ами Мицуно – Баннимен бірге оқитын салмақты әрі ұяң ару. Оның IQ дәрежесі 300-ге жетеді. Өте ақылды. Сейлор Меркурийге айналғанда ол су күшін қолданып, Сэйлор Мунге көмекке келеді.

Рэй Хино – өжет мінезді қыз. Болашақты болжап, Сэйлор Марсқа айналғанда от күшін басқарады.

Макото Кино – тәуелсіз әрі жігерлі қыз. Ата-анасынан ерте айырылған. Сейлор Юпитерге айналғанда оның найзағай басқаратын күші пайда болады.

Минако Айно – кербез мінезді ару. Баннидің жақын құрбысы. Сэйлор Венера болған сәтте ол сылқым мінезін ұмытып, әділдік үшін күресетін жанға айналады.

Анименің басты бес кейіпкерлерінің жанына кейін Мичиру Кайо (Сэйлор Нептун), Харука Тено (Сэйлор Уран) және Сецуна Мэйо (Сэйлор Плутон) қосылды.

Ал жұмбақ жан Такседо Маск (Мамору Джиба) кез келген уақытта сэйлор-сарбаздарға қолұшын созады.

Сэйлор-сарбаздардың ішіндегі ең кішкентайы Сэйлор Балақай (Сэйлор Малышка) көрермендердің көзайымына айналды.

«Сэйлор мун» анимесі – шынайы достық, адалдық, құрмет, ізгі ниетті кеңінен көрсететін туынды. Әділдік үшін күресетін мейірімділік пен сенімділік сияқты игі күштер талай көрерменнің жүрегін жаулағаны сөзсіз.

Суреттер: diary.ru, samogo.net, sailormooneternal.narod.ru