Peeple – үйді күзететін «ақылды» камера

Peeple – үйді күзететін «ақылды» камера
Фото: techcrunch.com

Үйінің қауіпсіздігін бірінші орынға қоятын адамдар Peeple жобасына қызығушылық танытары анық. Бұл – үйдің негізгі есігіне арналған смарт-камера болып табылады. Ол үйге келушілерді заманауи құрылым негізінде бақылай алады.

Америкалық инженерлер ұсынған жаңа гаджеттің ерекшеліктеріне тоқтала кетсек, «ақылды» камера үйге келіп, есікті қаққан адамды суретке түсіріп, үй иесінің смартфонына хабарлама ретінде жібереді. Осылай үйге кімнің келгенін есіктің алдына жақындамай-ақ білуге болады. Тәуелсіз бақылау iOS пен Android платформаларына арналып құрастырылған қосымша арқылы жүргізіледі.

Жоба жетекшілері гаджетті қашықтан бақылау қызметі үшін өзіндік оперативті жүйе жасаған. Аталған микроқұрылымның көмегімен үйіңізге келушілер туралы мәліметті үйде болмасаңыз да алып отырасыз.

Peeple гаджетін есікке орнату қиын емес. Ол қарапайым есік көзінің орнына икемделіп жасалған. Смарт-үй девайсы қуат көзі мен үйге рұқсатсыз кіру оқиғасын анықтайтын арнайы тетіктермен жабдықталған. Ал қашықтан бақылауға үйдегі Wi-Fi модемі қолдау білдіреді.

Қазіргі кезде құрастырушылар гаджетті жаппай өндіруге дайындалуда. Ал ресми таныстырылуы келесі жылдың мамыр айына жоспарланған. Гаджеттің әлемдік нарықтағы бағасы 99 АҚШ доллары көлемінде болмақ. 

Ұқсас жазбалар: 

Кез келген оператордың арманы – Lily (видео)

Microsoft HoloLens гарнитурасы қандай мүмкіндікке ие? (Видео)

Ж. Өрісбай