Алматыда мас-рестлингтен Әлем кубогы басталды

Алматыда мас-рестлингтен Әлем кубогы басталды

Алматыда мас-реслингтен Әлем кубогының бірінші кезеңі басталды.

Алматы қаласында мас-реслингтен Әлем кубогының бірінші кезеңі өтеді. 29-30 сәуірге жоспарланған жарысқа 13 елден 120-ға жуық спортшы қатысуда.

Мас-рестлинг – елімізде қарқынды түрде дамып келе жатқан спорт түрі екенін осыған дейін жазған едік. Саха халқының ұлттық спорты Қазақстанда дами бастағанына 5 жылдай уақыттың жүзі болған. Одан бергі аралықта қазақстандық спортшылар халықаралық жарыстарда жеңіске жетіп жүр. Әлем чемпионатының жүлдегерлері де бар. Биылғы Әлем кубогының бірінші кезеңін Қазақстан мас-рестлинг қауымдастығының ұйымдастыруы да тегін емес. Себебі бұл спорт түрі еліміздің бірнеше өңірінде жылдам дамып келеді.

Алматыдағы Әлем кубогының бірінші кезеңіне Ресей, Германия, Қырғызстан және Қазақстаннан қатысатын спортшылар саны едәуір көп. Жарыстың екінші кезеңі Прагада (Чехия), үшінші кезеңі Мәскеуде өтеді. Үшінші кезеңге алғашқы екі кезеңде ең көп жинаған спортшылар қатысады.

Ө. Сансызбай